Ushqysh bolýdy armandaǵan jigitter áýe qorǵanysy kúshteriniń qataryn tolyqtyrdy
Aqtóbedegi Talǵat Bıgeldınov atyndaǵy áýe qorǵanysy kúshteriniń áskerı ınstıtýtyn 93 túlek bitirdi. Olardyń bári 4 jyldan astam ýaqyt boıy bilim alyp, tájirıbe jınady. Aldaǵy ýaqytta barlyǵy elimizdiń áýe qorǵanysy kúshteriniń qataryn tolyqtarady. Túlekter 10 jylǵa kelisimshart jasap qoıǵan. Úzdik dıplom alǵan ushqyshtyń biri Aqtóbege Taldyqorǵannan kelgen.
«Oqý josparyna saı 3 kýrsty bitirgen soń alǵash ret áýege kóterildik. Elimizde ushaq túrleri óte kóp. Instıtýtta L-39 ushaǵymen tájirıbe jınap, endi Sý-30 ushaǵyna otyramyz. Men jumys isteýge Taldyqorǵan qalasyna baramyn. Aqtóbege kelip, oqý ornyna túsken kezden bastap biz ushqyshtar bolyp sanalamyz. Ushqyshtar ómir boıy oqıdy, tájirıbe jınaıdy. Árıne, áýege kóterilgende oqys jaǵdaılar bolady. Tehnıkanyń aty tehnıka. Keıde buzylady. Bárin jeńý naǵyz mamannyń qolynan keletin is. Kez kelgen adam ushqysh bola almaıdy. Ol ras. Eń birinshi kúnnen bastap kóptegen test, medıtsınalyq, psıhologııalyq tekserýden ótip júrmiz. Bul jalǵasady. Biz qyzmetten ketkenshe únemi tekserilemiz»,- dedi túlek Mıras Aıdaruly.
Ol bala kezden ushqysh bolýdy armandaǵan. Bul arman ata-anasynyń estelikterinde jıi aıtyldy. «Kishkentaı kezde aspanda ushyp bara jatqan ushaqty kórip, qolymdy joǵary kóterip, sońynan júgirip júrgenmin. Muny men eseıgen soń bildim. Mektep tabaldyryǵyn attap, 1 synypqa barǵannan bastap ushqysh bolamyn dep armandap, soǵan qol jetkizdim. Bul oqý orny Aqtóbede ekenin bilgen joqpyn, biraq qaıda bolsa da baramyn dedim. Oqý ornyna túspeı turyp ushaqtardyń keskindemesin jınap júrdim. Al ınstıtýtqa kelgen soń bárimiz aǵashtan ushaq jasadyq, sony saqtaımyz. Bul bizdiń boıtumarymyz»,- dedi jas maman.
Al radıoınjener mamandyǵyn ıgergen Ázız Dantaev aldaǵy 10 jylda QR Ulttyq qaýipsizdik komıtetiniń shekara qyzmetinde eńbek etedi.
«Almaty qalasynan Aqtóbege kelip, bilim aldym. Ákem men aǵam áskerı salada eńbek etedi. Men aldyńǵy tolqynnyń jolymen radıotehnıka salasyn tańdadym. Jer men kóktiń arasyn baılanystyryp otyramyn, aman-esen ushyp, qonýyna jaýap beremin. Eger aqaýlar bolsa, jóndeımin. Otandy qorǵaý árbir azamattyń qasıetti boryshy»,- dedi Ázız Dantaev. Injenerdiń armany general shenin alý, ol búgin leıtenant bolyp, oqý bitirdi.
Eske salsaq, T.Bıgeldınov atyndaǵy áýe qorǵanysy kúshteriniń áskerı ınstıtýty 2016 jyly jańa mamandyqty qosty. Qazir munda áskerı dárigerler daıyndalady.
