Ushqysh apat aldynda 3 mınýt buryn baılanysqa shyqqan
ALMATY. QazAqparat - Búgin tikushaq apatyna baılanysty QR Indýstrııa jáne ınfraqurylymdyq damý mınıstrliginiń Áýe oqıǵalaryn tekserý basqarmasynyń basshysy Nurlan Jumasultanov brıfıng ótkizdi, dep habarlaıdy QazAqparat tilshisi.
Onyń aıtýynsha, ushqysh Valentın Shıtovtyń 25-30 jyldyq tájirıbesi bolǵan.
«Onyń 4 myń saǵat ushý tájirıbesi bar. Dál osy tıptegi tikushaqpen 2 myń saǵat ushqan. 51 jastaǵy Valentın Shıtov óziniń 51 jasynyń 25-30 jylyn aspanǵa arnaǵan. Oqıǵa bolardan buryn 16:05-te baılanysqa shyqqan. Biraq, ol ne degenin ázirge aıta almaımyn. 16:08-16:09-da onyń ushaǵy jerge qulady», - dedi N.Jumasultanov.
Onyń aıtýynsha, ushaq Boraldaı áýejaıynan Úlken Almaty alańyna baǵyt alǵan. Dittegen jerge 10 shaqyrym jetpeı Alataý shıpajaıynyń mańynda qulaǵan. Tikushaq jolaýshylardy alyp ketýge bara jatqan bolýy yqtımal.
«Jolaýshylarǵa barǵan bolýy múmkin. Óıtkeni, bir ǵana ushqysh bolǵan», - dedi ol.
Spıkerdiń aıtýynsha, áýe kompanııasynyń tikushaqtardy ushyrýǵa kerekti barlyq ruqsaty bolǵan.
Quzyrly organdar tekserýge búginnen bastap kiristi. Sebebi, keshe qarańǵy bolyp ketkendikten, zertteý jumystary toqtatylǵan.
Aıta ketý kerek, qaıǵyly oqıǵa keshe Almatyda Naýryzbaı aýdanyna qarasty Taý samaly shaǵyn aýdanynda boldy.
«Alataý» shıpajaıynyń ashyq aýmaǵyna «Sky Service» áýe kompanııasynyń jeke menshigindegi Evrokopter-130 tikushaǵy qulady.
51 jastaǵy ushqysh Valentın Shıtov jedel járdem kóliginde kóz jumdy. Tikushaq Boraldaı-Úlken Almaty kóli baǵytynda ushyp bara jatqan.
Al kóliktegi PD qyzmetkerleri atalǵan derekke baılanysty QR QK 344-babyna sáıkes sotqa deıingi tergeý isi reestrine tirkedi (Áýe kóligin paıdalaný kezinde jol qozǵalysy erejelerin buzý).
Tergeý jumystary bastaldy.
Munyń aldynda QR IIDM Áýe oqıǵalaryn tekserý basqarmasynyń basshysy Nurlan Jumasultanov tikushaq apatynyń yqtımal 3 sebebin ataǵan bolatyn.
