Úshqońyrdaǵy júzdegen gektar jerge menshik quqyǵy zańsyz berilgen - Maqsat Tolyqbaı
ASTANA. KAZINFORM – Májilis depýtaty Maqsat Tolyqbaı Úshqońyr ústirtine barar joldy muzdaı qarýalanǵan toptyń kúzetýine narazylyq bildirdi. Bul rette ol Premer-Mınıstrdiń orynbasary Serik Jumanǵarın men Bas prokýror Berik Asylovtyń atyna saýal joldady.
«El aman, jurt tynyshta «taý-tasty menshiktep alypty» degendi estidińizder me?! Endeshe aıtaıyn. Úshqońyr degen taýdyń baryn bárińiz bilesizder. Talaılardyń kindik qany tamyp, tirligine arqaý bolǵan sol taý búginde saı-sala, qyrat-jotalarymen túgel bir azamattyń ǵana menshiginde. Almaty oblysyndaǵy Úshqońyr ústirtine barar joldy basynan aıaǵyna deıin muzdaı qarýalanǵan top kúzetedi. Jol joq emes, bar. Biraq jabyq. Kózimmen kórip, sol taýdyń etegindegi elmen tildesken soń, depýtattyq saýalǵa arqaý bolyp otyr. Birinshiden, Úshqońyr Іle Alataý parkine qaraıtyndyqtan, ol aýmaqty Ulttyq parktiń kúzetshileri kúzetý kerek emes pe? Álde, bul taý «DúnıeAgro» kompanııasyna atasynan mura bolyp qalǵan ba? Qyratqa kireberisten 8 shaqyrym qashyqta ornalasqan rezıdentsııanyń aýmaǵy ǵana qorshalyp, shlagbaým qoıylsa taǵy bir sári... Al, jan balasyn jýytpaı, taýdy aınaldyra qorshap tastaý - baryp turǵan bassyzdyq», - dedi M. Tolyqbaı Májilistiń jalpy otyrysynda.
Onyń aıtýynsha, Qarasaı aýdanynyń turǵyndary óz jerine óz maldaryn jaıa almaı otyr. AMANAT partııasy jaıylym tapshylyǵyn sheshý úshin arnaıy «Jer amanaty» komıssııasynyń tikeleı aralasýymen respýblıka boıynsha 9 mıllıon gektardan astam jer qaıtarylyp, al onyń osy aımaqtan 1400 gektary el ıgiline berildi.
«Sóıtsek, onymyz beker eken, «amanattyq» aǵaıyn! Jurtqa qajet jaıylym jerdiń bári jańaǵy qorshaýda qalyp qoıǵan. Osylaısha jurttyń óz jerine kirmek túgili jańaǵy qarýly beketten ótýge dáti jetpeı júr. Anyǵy, «DúnıeAgro» JShS-ine 2004 jyly «Úshqońyr» ústirtinde ornalasqan júzdegen gektar jerge menshik quqyǵy zańsyz berilgen. Óıtkeni, zań talaptary boıynsha arnaıy maqsattaǵy jerlerdi zańdy tulǵalardyń jekeshelep alýyna quqyǵy joq. Tipti ony bólýge de kelmeıdi. Bul normalardy jergilikti prokýratýra jaqsy biledi. Biraq, jerdiń zańsyz berilý faktisi boıynsha prokýratýranyń talaptaryn sot qanaǵattandyrmaı tastaǵan. Soraqysy da sol bolyp tur. «Sonda Qazaqstan Respýblıkasynyń zańyna shekesinen qaraıtyn bul ne qylǵan shekten shyǵý?», – degen halyqtyń bazynasyna qalaı jaýap beremiz?! Budan basqa, «Úshqońyr» ústirtinde «Steppe AgroMeat», «Breeding Company» sııaqty eki-úsh kompanııa 13 597 ga jerdi áli kúnge deıin maqsatsyz paıdalanyp otyrǵany anyqtaldy. Shuǵyl qaıtarý kerek!», - dedi depýtat.
Bul turǵyda M. Tolyqbaı Almaty oblysynyń Qarasaı aýdanynda bolyp jatqan zańsyzdyqtarǵa Bas prokýratýra men Úkimet shuǵyl nazar aýdaryp, Arnaıy komıssııa quryp, joǵaryda atalǵan máselelerge tıisti quqyqtyq baǵa berýi tıis ekenin aıtty.
