«Úshqońyr» rezıdentsııasy mańyndaǵy 50 myń gektar jer telimi aýktsıonǵa shyǵaryldy
ASTANA. KAZINFORM – «Qaıtarylǵan aktıvterdi basqarý kompanııasy» jaýapkershiligi shekteýli seriktestigi Almaty oblysynyń aýmaǵyndaǵy jalpy quny 1 mlrd 575 mln 778 myń 934 teńge bolatyn birneshe jer telimin aýktsıonǵa shyǵardy. Onyń ishinde áıgili Shamalǵan aýylyna jaqyn jatqan 50 myń gektar telim de bar.
Bul telimniń aýktsıondaǵy bastapqy baǵasy 43,8 mln teńge dep kórsetilgen.
- Baǵalaýǵa berilgen nysannyń ornalasqan orny jaqsy (áleýmettik ınfraqurylymy bar, kólik jetetin jerde, ekologııalyq jaǵdaıy ornyqty) dep sıpattalady. Jer telimi Іle Alataýy ulttyq parkiniń kúzetiletin aýmaǵynda, «Úshqońyr» rezıdentsııasyna baratyn jolda, kúzet beketinen keıin, Shamalǵan aýylynan 16 shaqyrym jerde jatyr, - dep jazylǵan nysandy baǵalaý týraly esepte.
Qujatta nysanǵa kólikpen kirý óte yńǵaıly ekeni aıtylǵan.
Buǵan deıin 2025 jyldyń basynan beri aýktsıondar arqyly 32 qaıtarylǵan aktıv satylǵanyn jazǵan edik.