Ushqyr oı men tereń bilim synǵa túsetin dodalardyń bereri mol — Qasym-Jomart Toqaev
ASTANA. KAZINFORM — Memleket basshysy Alem.ai battle jáne AI Governance Cup baıqaýlarynyń jeńimpazdaryn marapattaý rásiminde ushqyr oı men tereń bilim synǵa túsetin mundaı dodalardyń bereri mol ekenin aıtty. Bul týraly Aqordanyń baspasóz qyzmeti málim etti.
— Mazmundy ári tartysty jarystar arqyly jańashyldyq, izdenimpazdyq, jasampazdyq qundylyqtary keńinen dáripteledi. Qoǵamda jańa tehnologııalyq mádenıet qalyptasady. Alem.ai battle saıysyna mektep oqýshylary, stýdentter, jas ǵalymdar jáne IT salasynyń mamandary qatysty. Olar ózara tájirıbe almasyp, bir-birine qoldaý kórsetti. Baıqaý aıasynda daryndy azamattarymyz densaýlyq saqtaý júıesi, bilim berý salasy jáne jasandy ıntellekt modelderin úıretý máselesine qatysty ınnovatsııalyq sheshimder usyndy. Sondyqtan bul saıysty ozyq ıdeıalardyń básekesi desek, qate bolmaıdy. Osyndaı sharalar sizderdi kásibı turǵydan shyńdaıdy, elimizde jáne álemde suranysqa ıe bolatyn mańyzdy jobalardy iske asyrýǵa jol ashady dep senemin. AI Governance Cup baıqaýynyń da mán-mańyzy aıryqsha. Bul saıysta jasandy ıntellektini memlekettik basqarý isine engizýge arnalǵan irgeli bastamalar usynyldy. Sonyń ishinde medıtsınalyq kýálandyrý júıesin avtomattandyrý, ıntellektýaldyq prokýrorlyq qadaǵalaý, pedagogterdi qoldaý júıelerin erekshe atap ótýge bolady. Munyń bári ıdeıa nemese pılottyq joba deńgeıinde qalyp qoımaýy kerek. Negizgi maqsat — ozyq ıdeıalar men bastamalardy memlekettik qurylymdardyń qyzmetine kezeń-kezeńimen engizip, jumystyń tıimdiligin arttyrý. Osyǵan basa nazar aýdarý qajet. Osyndaı bedeldi baıqaýlarda júldeli bolý — shyn máninde, úlken jetistik. Sizderdiń jeńisterińiz — úzdiksiz izdenis pen tabandy eńbektiń jemisi ekeni sózsiz. Bárińizge shynaıy rızashylyǵymdy bildiremin. Memleket jańashyl, jasampaz azamattarǵa zor úmit artady, árdaıym qoldaý kórsetedi, — dedi Qasym-Jomart Toqaev.
Osy jıynda tsıfrlandyrý men JI engizý elimizdi jan-jaqty jańǵyrtýdyń negizgi faktorlarynyń biri ekeni aıtyldy.
