Úshinshi jańǵyrý arqyly jańa pragmatıkalyq sıpattaǵy deńgeıge qol jetkizbekpiz
ASTANA. QazAqparat - Damyǵan otyz eldiń qataryna qosylýdy maqsat tutqan Qazaqstan sońǵy shırek ǵasyrda bıik belesterdi baǵyndyryp, birliktiń arqasynda biregeı jetistikterge jetti. Aldymen el turmysyna eleýli kóńil bólgen memlekettik saıasat endigi kezekte eldiń rýhyn jańǵyrtýǵa baǵyt túzedi. Buqaraǵa jaqqan bul izgi bastamany Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynan aıqyn túısinýge bolady. «Sanamyzdyń izimizden ozyp júrýin» paıymdap, «ulttyq rýhymyzdyń boıymyzda máńgi qalýyn» belgilep bergen Nursultan Ábishuly ult bolyp uıysyp, jurt bolyp jumylýdyń jolyn kórsetip otyr. Endeshe, bul baǵdar «men» degen ár otandasymyzǵa taýdaı jaýapkershilik júkteıdi
Elbasynyń «ulttyq kod» uǵymyn tilge tıek etýi osynaý jaýapty kezeńde kóp mán-jaıdy ańǵartady. Ulttyq kodtyń qalyptasýy aınalyp kelgende «Máńgilik El» bolý maqsatynyń mańyzdy bólshegi ekeni anyq. Baı jáne baqýatty, aıbyndy ári sán-saltanaty jarasqan memleket bolý qanshalyqty mańyzdy bolǵanymen, ulttyq yntymaqtyń irgesi bekimeı ilgeri qadam basý múmkin emes. Elbasynyń «ulttyq salt-dástúrdi órkendeýdiń berik dińgegi ete otyryp, árbir qadamyn nyq basýyn qalaýy» ortaq múddeniń pisip-jetilgenin bildiredi.
Nursultan Nazarbaev otandastarymyzdyń básekege qabiletti bolýyn bul jolǵy baǵdarlamalyq maqalasynda erekshe atap ótti. Meıli, muǵalim nemese tártip saqshysy bolsyn, meıli dáriger bolsyn óz ortasynyń kásibı mamany bolsa, eldiń de eńsesi eńkish tartpaıdy. «Aldymen sananyń oıyn saraptap, ulttyq rýhty qabilettilikke, básekelestikke ushtastyra bilýdiń mańyzy zor. «Jańǵyrý jolynda babalardan mıras bolyp qanymyzǵa sińgen, búginde tamyrymyzda búlkildep jatqan izgi qasıetterimizdi qaıta túletýimiz kerek» dedi Elbasy.
Elbasynyń salıqaly oıy, árbir paıymdy pikiri tarıhqa degen kózqarasty túzetýge, ulttyq biregeılikti saqtaýǵa, ulttyq sana-sezimniń kókjıegin keńeıtýge baǵamdy baǵdar. «Bizge tarıh jaıly ózderiniń sýbektıvti paıymdaryn tyqpalaýǵa eshkimniń qaqysy joq», deýi sheshimdi pikir. Jalpy azamat tarıhyna úńilsek, álemdegi ozyq órkenıetter ulttyq sıpattan bastaý alǵandyǵyn bilemiz.
Úshinshi jańǵyrý arqyly biz álemge elimizdiń jańasha bet-beınesin tanytyp, ótken dáýirden qalǵan taptaýryn qaǵıdalardy ózgertip, oryndalmaıtyn «eles ıdeologııalardan» boıdy aýlaq ustaýǵa, jańa pragmatıkalyq sıpattaǵy deńgeıge qol jetkizbekpiz. Qazaqstannyń táýelsizdik kezeńindegi jańǵyrýy baıypty qalypta, ýaqyt talabyn eskere otyryp, kezeń-kezeńimen júzege asýda. Evolıýtsııalyq jolmen jańǵyrý qazaqstandyq azamattyń basty baǵdaryna aınalmaq. Olaı deýimizge sebep álemdegi túrli revolıýtsııalardyń eshqashan ońtaıly nátıje ákelmegenin bilemiz. Osyǵan oraı rýhanı jańǵyrýda qoıylyp otyrǵan mejeli máseleniń biri - «sananyń ashyqtyǵy».
Jahandaný úrdisindegi basty talap álemdik tilderdi ıgerýge umtylý. Bul bizdiń ǵalamdyq úrdiske tolyqqandy aralasýymyzǵa jol ashyp, álemdik ozyq tájirıbeler men jetistikterge qol jetkizýimizge múmkindik ápermek. Sonymen qatar, mádenıetimizdiń ozyq úlgileri álemdik deńgeıde keńinen tanylyp, dúnıejúzindegi básekege qabilettiligi halyqaralyq deńgeıge saı bolýy qajet. Osy baǵytta Elbasy rýhanı jańǵyrýdy júzege asyrýda álemde eshkimge uqsamaıtyn derbes ult bolýymyz úshin «Jahandaǵy zamanaýı Qazaqstandyq mádenıet» jobasyn iske asyrýdyń mejeli mindetin qoıyp otyr. Mádenıetti jasaıtyn halyq bolǵandyqtan, osy ıdeıanyń aıasynda zamandastarymyzdyń jetistikterin kórsetýge baǵyttalǵan «Qazaqstandaǵy 100 jańa esim» jobasy qolǵa alynbaq. Osy rette táýelsizdiktiń irgetasyn qalaýǵa súbeli úles qosqan tuǵyry bıik tulǵalarymyzdy elge tanytatyn jańa bastama bolmaq.
Týǵan jerinen tamyr tartqan ár adam balasy kindik qany tamǵan jeri, týǵan elin ińkárlikpen qushtarlana súıýi arqyly el mádenıeti men salt-dástúrlerine aıryqsha atsalysýda shynaıy patrıotızmniń mańyzdy kórinisi bolmaq. Osy oraıda, yntymaǵy jarasyp, túrli ulystyń basyn qosqan qasterli qazaq topyraǵy beıbitshiliktiń qara shańyraǵyna aınalyp otyr.
