Úshinshi tulǵalarǵa ózge azamattar týraly anyqtama alýǵa ruqsat etiledi

ASTANA. QazAqparat - 2018 jyldan bastap, Elektrondy úkimet portalynda jeke jáne zańdy tulǵalarǵa ózge azamattar týraly elektrondy anyqtama berý qyzmeti qoljetimdi bolady, dep habarlaıdy QazAqparat tilshisi.

Jeke jáne zańdy tulǵalar kez kelgen azamattyń turǵylyqty mekenjaıy boıynsha, jyljymaıtyn múlikqa qatysty elektrondy anyqtamalardy ala alady.

«Qoldanýshy joǵaryda atalǵan anyqtamalarǵa tapsyrys bergende azamattardyń telefonyna jáne jeke kabınetine habarlama kelip, úshinshi tulǵalarǵa anyqtama berýge ruqsat suraıdy. Úshinshi tulǵa retinde jeke jáne zańdy tulǵalar anyqtamaǵa suraý sala alady», - dep túsindirdi «Ulttyq aqparattyq tehnologııalar» AQ basqarma tóraıymy Botagóz Qasabek Úkimet úıinde ótken baspasóz máslıhatynda.

Eske sala ketsek, 10 qańtarda jarııalanǵan Memleket basshysy Joldaýynyń segizinshi bólimi tıimdi memlekettik basqarýǵa arnalǵan edi. Onda memlekettik organdardyń naqty ýaqyt jáne jedel jaýap berý rejiminde azamattardyń eskertpeleri men usynystaryn esepke alý úshin zamanaýı tsıfrlyq tehnologııalardy qoldaný týraly basa aıtyldy.