Úshinshi ret Azıada oıyndaryn ótkizip jatqan Sapporo - týrısterdiń aǵylyp keletin qalasy
SAPPORO. QazAqparat - Osymen bir emes, úshinshi ret Qysqy Azıada oıyndaryn ótkizip jatqan Sapporo qalasyna keshe Qazaqstan delegatsııasynyń sońǵy músheleri kelip jetti. Olardyń ishinde tilshiler qaýymy da boldy.
Áli de kóp nársege qanyǵa qoımaǵanmen Qysqy Azıada oıyndarynyń otany atanyp ketken Sapporo qalasy týraly oqyrmandarymyzǵa azda bolsa kórgen, bilgen, estigen jańalyqtarymyzben bólise otyrýdy jón sanadyq.
Sapporo qalasynyń aýa raıy jalpy elimizdiń soltústik eldi mekenderindegi aýa raıynyna uqsaıtyn kórinedi. Dál qazir -3-4 gradýsty kórsetip turǵanymen aıazdyń barlyǵy seziledi. Qardyń qalyńdyǵy 20-30 santımetrdeı. Alaıda kósheler tap-taza.
Sapporo qalasy - Japonııanyń Hokkaıdo aralynda ornalasqan. Ol bul eldegi tórtinshi úlken qala bolyp sanalady. Sondaı-aq, Sapporo japondardyń ekonomıkalyq, ónerkásiptik, mádenı ortalyǵy. Qaladaǵy halqynyń sany 2010 jylǵy sanaqqa qaraǵanda, 1 896 207 adamdy quraǵan. Qazir 2 mıllıonǵa jýyqtap qalsa kerek, kóshede adam qarasy óte kóp. Al kólemi 1121,12 sharshy shaqyrymdy alyp jatyr.
Sapporo shıpajaıly oryn kórinedi. Biz alǵan málimet kózderine súıensek, qala mańynda kóptegen ystyq mıneraldy bulaqtar bar. Jylda qysta dástúrli túrde ótetin Qar festıvali de osynda uıymdastyrylady. Oǵan jylyna búkil álemnen 2 mln týrıst kelip, tamashalaıtyn kórinedi.
Mine, osyndaı qalada bıyl úshinshi márte Qysqy Azıada oıyndary ótip jatyr. Alǵash ret - 1972 Qysqy Olımpıada oıyndarynyń astanasy atansa, odan keıin, - 1986, 1990-shy jyldary Qysqy Azıada oıyndaryn ótkizdi. Mine, búgin alaýy tutanǵan 8-shi Qysqy Azıada oıyndary úshinshisi.
foto: Danııar Maılybaev
