Úshinshi elderden ákelingen avtokólikterdi kedendik tazartýdan soń ǵana aıdaýǵa bolady

NUR-SULTAN. QazAqparat - Sońǵy kezderi Qazaqstan aýmaǵyna shet el azamattarynyń jeke paıdalanýyna arnalǵan kólik quraldaryn ýaqytsha alyp kelý jaǵdaılary jıilep ketken, dep habarlaıdy QazAqparat Memlekettik kirister komıtetine silteme jasap.

Bul kólikter negizinen Grýzııa men Ázerbaıjan azamattarynyń atyna tirkelgen. Mundaı kólik quraldary sodan soń, bizdiń eldiń azamattarynyń «ıeligine» beriledi.

«Eskeretin jáıt, Eýrazııalyq ekonomıkalyq odaqtyń (EAEO) keden aýmaǵyna úshinshi elderden ýaqytsha ákelingen kólik quraldary sheteldik taýarlar bolyp tabylady jáne kedendik baqylaýda bolady (úshinshi elder - EAEO quramyna kirmeıtin elder). Osyǵan oraı, ýaqytsha ákelingen kólik quraldaryn satyp alýǵa jáne Qazaqstan aýmaǵynda paıdalanýǵa tek kedendik tazartýdan soń jáne sáıkesinshe tıesili kedendik alymdar men salyqtardy tólegen soń ǵana qoldanýǵa bolatynyn eskertemiz», - dep jazdy vedomstvodan.

Jeke paıdalanýǵa arnalǵan sheteldik kólik quraldaryn, shetel azamattary óz kólik quraldaryn ákelgen soń, Qazaqstannyń aýmaǵynan belgili bir ýaqyttan keıin ketip qalatyny baıqalýda. ıAǵnı, EAEO aýmaǵyna atalǵan avtokólik quraldary ákelingende, Qazaqstan azamatyna berý maqsatynda kelgen dep paıymdalýda.

«Ýaqytsha ákelý merzimi aıaqtalǵannan keıin (1 jyl) avtokólik quraldary EAEO aýmaǵynan shyǵyp ketýi qajet. Eger shyǵyp ketpese, EAEO-tyń qoldanystaǵy zańnamasyna sáıkes tıisti sharalar qoldanylady», - delingen habarlamada.

Komıtet Polıtsııa departamentterimen birlese otyryp, reıdttik is- sharalar júrgizýdi uıymdastyrǵan, qoldanystaǵy zańnamaǵa sáıkes ondaı kólikter ustalady.

Qazirgi tańda 116 avtokólik quraly ustalyp, ýaqytsha saqtaý qoımalaryna ornalastyrylǵan. Bul baǵyttaǵy jumystar jalǵasýda.

Osyǵan baılanysty, Memlekettik kirister komıteti Qazaqstan azamattarynan jeke paıdalanýǵa arnalǵan avtokólikti satyp alǵanda, elimizdiń zańnamasyn saqtaýdy suraıdy. Alaıda Siz satyp alǵaly jatqan avtokóligińizdiń shyǵý tarıhy nemese zańdylyǵy kúdik týǵyzatyn bolsa, onda Qazaqstanda kedendik tazartýdan ótkeni jáne tıesili kedendik alymdar men salyqtar tólegeni týraly aqparatty memlekettik kirister organdarynan bilýge bolady. Ol úshin komıtetke (87172 71 77 24) nemese turǵylyqty jerdegi Memlekettik kirister departamentine, sonymen qatar QR QM MKK Baılanys ortalyǵyna habarlasýǵa bolady.