Úsheýi janyp ketti: Aqtóbede órtten keıin gaz quıý beketiniń ıesi qamaldy
AQTÓBE. KAZINFORM — Qylmystyq kodekstiń «Jarylys qaýpi bar obektilerde qaýipsizdik qaǵıdalaryn buzý» baby boıynsha is qozǵaldy. Al aman qalǵan er adam qazir em qabyldap jatyr.
Aqtóbe oblystyq PD baspasóz qyzmetiniń habarlaýynsha, órtten keıin birden is qozǵaldy.
— Gaz quıý beketinde Honda markaly kólik órtendi. Oqıǵa saldarynan úsh adam, áıel jáne eki kámeletke tolmaǵan bala qaza tapty. Sondaı-aq er adam kúıik shalyp, medıtsınalyq mekemege jetkizildi. QR Qylmystyq kodeksiniń 281-baby («Jarylys qaýpi bar obektilerde qaýipsizdik qaǵıdalaryn buzý») boıynsha is tirkeldi. Avtogaz quıý stantsııasynyń ıesi ustalyp, ýaqytsha ustaý ızolıatoryna qamaldy, — dedi Aqtóbe oblystyq PD bastyǵynyń orynbasary Áset Qalıev.
Aýrýhanaǵa 1972 jylǵy er adam jetkizilgen.
— Denesiniń joǵarǵy bóligin kúıik shalǵan naýqas jansaqtaý bólimine tústi. Ol Aqtóbe qalalyq kópbeıindi aýrýhanasynda jatyr. Esin biledi, ózdiginen dem alyp jatyr. Em taǵaıyndaldy, — dep habarlady Aqtóbe oblystyq densaýlyq saqtaý basqarmasynyń baspasóz qyzmeti.
Aıta keteıik, oqıǵa keshe túnde Aqtóbe qalasynda boldy. Kólik ishinde tirideı janyp ketken úsh adamnyń ekeýi kámelet jasqa tolmaǵan.
