Úsheýi apatty jaǵdaıda: Almaty oblysyndaǵy kólik júretin kópirlerdiń jaı-kúıi qalaı
QONAEV. KAZINFORM — Almaty oblysynda 400-ge jýyq kólik júretin kópir bar.
Biraq olardyń barlyǵy jaqsy jaǵdaıda deýge kelmeıdi. Shilde aıdyń basynda Eńbekshiqazaq aýdanynda Úlken Almaty kanaly boıyndaǵy kópirdi sý shaıyp ketti.
Ol kezde oblys ákimdigi kópirdiń tótenshe jaǵdaıǵa deıin apatty dep tanylǵanyn málimdegen bolatyn. Osy oraıda, agenttik óńirdegi barlyq kólik kópirleriniń jaı-kúıin bilý úshin jaýapty vedomstvoǵa saýal joldady.
Almaty oblysynyń jolaýshy kóligi jáne avtomobıl joldary basqarmasynyń jaýabyna sáıkes, oblys boıynsha avtomobıl joldarynda ornalasqan 392 kópir bar. Onyń ishinde respýblıkalyq mańyzy bar — 152 kópir, oblystyq mańyzy bar — 132 kópir, aýdandyq mańyzy bar — 108 kópir.
Aýdan boıynsha: Alataý qalasy — 16, Qonaev qalasy — 8, Kegen aýdany — 21, Qarasaı aýdany — 36, Talǵar aýdany — 27, Uıǵyr aýdany — 13, Іle aýdany — 81, Balqash aýdany — 15, Raıymbek aýdany — 29, Jambyl aýdany — 27, Eńbekshiqazaq aýdany — 122 kópir bar.
Olardyń ishinde úsheýi apatty jaǵdaıda dep tanylǵan. Ekeýi Eńbekshiqazaq aýdanynda, bireýi Qarasaı aýdanynda ornalasqan. Vedomstvo 2025 jyly apatty dep tanylǵan Qarasaıdaǵy kópir qazir kúrdeli jóndeýden ótip, qoldanysqa berilgenin málimdedi. Al qalǵan ekeýinde jańǵyrtý jumystary bastalǵan.
— Eńbekshiqazaq aýdanyndaǵy 2 kópir 2024 jyly apatty dep sanalǵan. Qazirgi tańda atlǵan kópirler boıynsha jańǵyrtý jumystary júrgizilip jatyr, — dep habarlady basqarmadan.
Odan bólek oblys aýmaǵyndaǵy respýblıkalyq jáne jergilikti mańyzy bar avtomobıl joldaryn kútip-ustaý aıasynda 6 merdiger uıym qyzmet kórsetip jatqany atap ótildi.
Almaty oblysynyń jolaýshy kóligi jáne avtomobıl joldary basqarma basshysynyń orynbasary Almaz Naqypbaevtyń aıtýynsha, kólik kópirleriniń jaǵdaıy turaqty túrde tekserilip keledi. Al olardyń jaramdylyǵy arnaıy vızýaldy jáne aspaptyq tekserýler arqyly anyqtalady. Tekserý nátıjesine sáıkes, kópir qurylymdaryn kúsheıtý jumystary josparly túrde júrgiziledi.
— Aldaǵy ýaqytta kópirlerdiń otyrylýynyń aldyn alý maqsatynda tireýishterdi nyǵaıtý, sý burý júıelerin retteý jáne konstrýktıvti elementterdi kúsheıtý sııaqty aldyn alý jumystary turaqty túrde júrgizilip keledi, — dedi ol.
Eske salaıyq, Atyraýdaǵy alty kópirdiń tehnıkalyq jaǵdaıy zertteledi.
