Úshemdi dúnıege ákelgen ata-analarǵa baspana kezeksiz berilýi kerek - Q. Aıtahanuly
ASTANA. QazAqparat - Úshemdi dúnıege ákelgen analarǵa memlekettik turǵyn úı qorynan baspana kezeksiz berilýi kerek. Búgin Parlament Senatynyń jalpy otyrysynda senator Qýanysh Aıtahanuly osy meseleni kóterip, Úkimet múshelerine qulaqqaǵys jasady.
Eske sala keteıik, jalpy otyrysta «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldanǵan bolatyn.
Qujatta Uly Otan soǵysynyń qatysýshylary men múgedekterine jáne solarǵa teńestirilgen adamdarǵa beriletin jeńildikter men olardy áleýmettik qorǵaý, jetim balalardyń, ata-analarynyń qamqorlyǵynan aıyrylǵan balalardyń turǵyn úıge sózsiz quqyǵy qamtylǵan. «Bul kópten aıtylyp kele jatqan óte durys másele. Al endigi kezekte páter alýdyń birinshi kezegine kóp balaly Batyr analardy qosý. 7-8 sábıge álemniń jaryǵyn syılap, tún uıqysyn tórt bólip, olardy baǵyp-qaǵýda elimizdiń órkendeýine eńbek etetin, táýelsizdigimizdi qorǵaıtyn azamattardy dúnıege keltirip, olardy tárbıeleýden artyq mańyzdy qyzmet te, jumys ta, qundylyqtar da joq shyǵar dep esepteımin», - dedi senator Qýanysh Aıtahanuly.
Budan bólek, depýtat elimizde jyl saıyn 40-50 úshemder dúnıege keletinin, al olardy dúnıege ákelgen otbasylarǵa óńir basshylarynyń qamqorlyǵymen qaltaly azamattar esebinen páterler beriletinin, járdemder bolatynyn jetkizdi.
«Alaıda, halqymyzdyń sanyn kóbeıtýge erekshe úles qosyp otyrǵan, dúnıege úshem ákelý baqytyn ıelengen ata-analarǵa zańdy túrde qamqorlyq jasalyp, baspana berilip jatqan joq. Sábıli bolǵan jas otbasylarǵa birinshi kezekte baspananyń kerektigi bárimizge belgili. Qazirgi zamanda úshem emes, bir balany baǵyp-qaǵýdyń ózi ońaı emes. Al úsh sábıge jaryq dúnıe syılap, ony baǵyp-qaǵyp otyrǵan ata-anaǵa memleket tarapynan qandaı qamqorlyq jasalsa da jarasady. Sondyqtan da, zań jobasynda «úshem jáne odan da kóp balany dúnıege ákelgen ata-analarǵa memlekettik turǵyn úı qorynan kezekten tys turǵyn úı alý quqy bar» degen normany usynamyn», - dedi Qýanysh Aıtahanuly. Bul rette senator jylyna elimizde 40-50 úshem dúnıege keletinin, al ondaı otbasylardy 3 bólmeli páterlermen qamtamasyz etýge shamamen 500 mln. teńge qajet ekenin de eske saldy.
«Qurmetti Erbolat Asqarbekuly jáne Úkimet ókilderi! Jyl saıyn mıllıardtaǵan qarjylar ıgerilmeı jatqanda úshem týǵan analarǵa kezeksiz páter berý úshin jarty mıllıard teńge tabý qıyn bola qoımas. Tym bolmasa Úkimet pen oblys ákimderiniń rezervtik qorlary esebinen qarjy bólinse de kóptegen máseleni sheshýge bolady dep oılaımyn», - dedi Q. Aıtahanuly.
