Úshemdi dúnıege ákelgen astanalyq áıel Ana men bala Ulttyq ǵylymı ortalyǵynan erteń úıine shyǵady

Astana qalasynyń turǵyndary Eltaı men Saǵılash Serikbaevtar otaý qurǵaly 16 jyl bolsa-daǵy, osy ýaqytqa deıin perzent súıip kórmegen. Al ústimizdegi jylǵy 29 qańtarda 36 jastaǵy S.Serikbaeva dúnıege birden úsh sábıdi alyp keldi.

Agenttik tilshilerine suhbat bergen úshemniń ákesi Eltaıdyń aıtýynsha, araǵa bir mınýt salyp dúnıe esigin ashqan nárestelerdiń birinshisi qyz bala boldy. 1,350 gr. salmaqpen týylǵan onyń esimin ata-anasy Aısha dep atady. Salmaǵy 1,225 gr. bolyp týylǵan ekinshi qyzdyń esimi Aııa bolsa, salmaǵy 1,450 gr. bolyp ómirge kelgen kenje ulǵa - Álı esimi berildi.

Ana men bala ortalyǵy nárestelerdi kútý bóliminiń neonatolog dárigeri Marııa Afanasevanyń aıtýynsha, ana merziminen buryn bosanǵandyqtan, sábıler birneshe kún jan saqtaý bóliminde jatty. «Qazir balalardyń densaýlyǵy - qanaǵattanarlyq, erteń úılerine shyǵaramyz», - dedi ol.

Dárigerdiń sózine qaraǵanda, Ana men bala ortalyǵynda úshemder jıi dúnıege keledi. Sebebi, birden úsh qursaq kótergen ózge oblystardaǵy áıelder osy ortalyqqa joldanady. Ár óńir óz aımaǵynda týǵan úshemderge ózderinshe qurmet kórsetip, kóńil-iltıpattaryn bildiredi. Elordalyqtar da jerlesteriniń bul qýanyshyna ortaqtasýda.