Úsharal polıtseıleri kisi óliminiń izin sýytpaı ashty
TALDYQORǴAN. QazAqparat - Almaty oblysy Úsharal qalasynyń polıtseıleri kisi ólimi oryn alǵan qylmystyń izin sýytpaı ashty, dep habarlaıdy QazAqparat Polisia.kz saıtyna silteme jasap.
Saǵat 03.30-da Alakól APB kezekshi bólimine Úsharal qalasyndaǵy aýdandyq aýrýhanadan 21 jastaǵy turǵynnyń oq jaraqatymen aýrýhanaǵa jetkizilgeni týraly habarlama kelip túsken. Alǵan jaraqattarynyń saldarynan zardap shegýshi qaıtys boldy. Osy derek QR Qylmystyq kodeksiniń 24-babynyń 3-bóligi, 99-babynyń 9-tarmaǵynyń 2-bóligi boıynsha tirkelgen soń polıtsııa qyzmetkerleri oqıǵanyń mán-jaıyn anyqtaýǵa kiristi.
– Jedel-izdestirý sharalary barysynda úsh saǵat ishinde kórshi aýyldyń esh jerde jumys istemeıtin oqıǵa ornynan iz sýytqan 23 jastaǵy turǵyny kúdikke ilindi. Polıtseıler A.Ospanov, D.Álimjanov syndy jedel ýákilder men ýchaskelik polıtsııa ınspektory N. Qorabaevtyń úılesimdi jumysynyń arqasynda kún batqannan keıin qylmysqa qatysy bar tulǵa qolǵa tústi. Usynylǵan bultartpas aıǵaqtar negizinde kúdikti aýyr qylmys jasaǵanyn moıyndady, – dedi Alakól aýdandyq polıtsııa bólimi bastyǵynyń orynbasary Saıat Slıamov. Qaıǵyly jaǵdaıǵa ákep soqqan ańshy myltyǵy ekeni anyqtalyp, myltyq kúdiktiniń aıǵaqtaryn tekserý barysynda qylmys ornynyń mańyndaǵy qaraýsyz qalǵan ǵımarattan tabyldy. Sondaı-aq, jalǵyz uńǵyly basqa ańshy myltyǵy qamys ósken sý astynan shyǵaryldy. – Aldyn ala tergeý barysynda aýyr qylmysqa barýdyń negizgi sebepteri jumysy joq jastardyń esh sebepsiz kóshe qańǵyrýy. Jastar arasyndaǵy dórekilik kıkiljińge ulasyp, sońy tóbeles pen adam ólimine ákep soqqan. Qazirgi ýaqytta kúdikti azamat ustalyp, ýaqytsha ustaý ızolıatoryna qamaqqa alyndy, – dep tolyqtyrdy Saıat Slıamov.
