Úsharal men Úrjar áýejaılaryn jóndeý tez arada aıaqtalýy tıis - mınıstrlik

NUR-SULTAN. QazAqparat – Jergilikti atqarýshy organdarǵa Úsharal jáne Úrjar áýejaılaryndaǵy jóndeý jumystaryn tez arada aıaqtaý tapsyryldy, dep habarlaıdy QazAqparat tilshisi Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

Jobaǵa sáıkes, atalǵan áýejaılarǵa ushý-qoný jáne baǵdarlaý jolaqtaryn salý, jaryq-sıgnaldyq jabdyqtarmen qamtamasyz etý qarastyrylǵan. Bul baǵyttaǵy jumystardy Jetisý jáne Abaı oblystarynyń ákimdikteri júrgizip jatyr. Jergilikti atqarýshy organdar rekonstrýktsııalaý jónindegi barlyq jumystardy týrıstik maýsymnyń bastalýyna qaraı aıaqtaýdy josparlaǵan. Alaıda, merdiger uıymdar jumysty ýaqtyly oryndamaı, áýejaıdy ashý merzimi keıinge shegerildi.

«Osyǵan baılanysty Indýstrııa jáne ınfraqurylymdyq damý mınıstri Qaıyrbek Óskenbaev Úsharal jáne Úrjar áýejaılarynda qurylys jumystaryn dereý aıaqtaýdy tapsyrdy», - dep habarlady vedomstvonyń baspasóz qyzmetinen.

Al, Úsharal jáne Úrjar áýejaılaryna sýbsıdııalanǵan reısterdi uıymdastyrý jumystary bolsa, merziminen buryn aıaqtaldy. Ol úshin qajetti qarjy bólinip, reısterdi oryndaıtyn avıakompanııalar anyqtalǵan.

Úsharal-Almaty jáne Úsharal-Nur-Sultan baǵytynda jolaýshylardy «SCAT» avıakompanııasy tasymaldaıdy. Reıster jazǵy maýsymda aptasyna 14 ret, al qalǵan mezgilderde aptasyna 7 ret oryndalady. Bılet quny – 15-16 myń teńge bolady.

Sondaı-aq, Úsharal-Taldyqorǵan baǵyty boıynsha jolaýshylardy «Jetisý» avıakompanııasy tasymaldaıdy. Ol jazda aptasyna 28, al qalǵan mezgilderde 14 reıs oryndaıdy. Bul baǵytqa «L-410» ushaqtary ushady. Bılet quny – 8 myń teńge.

Úrjar-Almaty jáne Úrjar-Nur-Sultan baǵytynda «ıÝjnoe nebo» avıakompanııasy qyzmet kórsetetin bolady. Atalǵan baǵyttarǵa reısterdi «An-24» ushaǵy oryndaıdy. Reıster jazǵy maýsymda aptasyna 10 ret, al qalǵan mezgilderde aptasyna 5 ret jasalady. Bılet quny – 14-16 myń teńge bolady.

Jergilikti atqarýshy organdardyń aqparaty boıynsha, Úsharal áýejaıyn 20 shildede, al Úrjar áýejaıyn tamyz aıynyń bas kezeńinde ashý josparlanyp otyr.

Úsharal jáne Úrjar áýejaılaryn jóndeýge ýaqytsha jabý kezeńinde Alakól jaǵalaýyna jetý joly retinde qosymsha poıyzdar qarastyrylǵan.

Alakól aımaǵyna deıin myna baǵyttaǵy poıyzdar júredi:

Almaty-Alakól:

№221/222 «Almaty-2 – Dostyq», aptasyna 3 ret;

№ 255/256 «Almaty-2 – Dostyq», aptasyna 3 ret;

№ 211/212 «Almaty-2 – Dostyq», aptasyna 2 ret;

453/454 «Almaty-2 – Dostyq», jaz mezgilinde aptasyna 3 ret;

Nur-Sultan-Alakól:

№ 258/257 «Nur-Sultan – Dostyq», jaz mezgilinde aptasyna 2 ret;

№ 54/53 «Nur-Sultan – Dostyq», aptasyna 2 ret;

№ 121/122 «Nur-Sultan – Semeı» poıyzynda 6 tirkemeli vagon, jazǵy maýsymda kúnara.

Nur-Sultan-Semeı:

457/458 «Semeı – Dostyq», jaz mezgilinde kúnara;

459/460 «Óskemen-Dostyq», jaz mezgilinde kúnara.

Foto: primeminister.kz