Úsharal qalasy áýejaıynda jańa termınal salynady
TALDYQORǴAN. KAZINFORM — Qurylystyń eki nusqasy qarastyrylýda: birinshisi - ǵımarattardy kelý jáne ketý aımaqtaryna bóle otyryp, qoldanystaǵy termınaldyń janynan shaǵyn termınal salý; ekinshisi – birden úlken termınal salý.
Bul týraly Kólik mınıstri Marat Qarabaevtyń Jetisý óńiri turǵyndarymen kezdesýinde belgili boldy. Qazirgi ýaqytta jergilikti atqarýshy organ jobanyń tehnıkalyq-ekonomıkalyq negizdemesin taldap, ázirleýde.
Sondaı-aq, búgingi tańda «Saryózek-Kóktal» jolynyń 45-68-shi shaqyrymdary arasynda kúrdeli jóndeý, al 68-110 shaqyrymdary arasynda ortasha jóndeý jumystary aıaqtaldy. Kelesi jyly 0-den 45-shi shaqyrymǵa deıin ortasha jóndeý jumystary júrgiziledi. Tıisinshe, jol tolyǵymen retke keltiriledi.
Jalpy uzyndyǵy 762 shaqyrymdy quraıtyn «Taldyqorǵan-Qalbataý-Óskemen» jolyn qaıta jańǵyrtý jumystary da 2024 jyldyń sońyna deıin aıaqtalady.
Óńir turǵyndarymen erkin formatta ótken kezdesýde vedomstvo basshysy mınıstrliktiń quzyretine kiretin jáne osy óńirge qatysty suraqtarǵa barynsha ashyq jaýap berdi.
Qazaqstandyqtardyń suraqtary avıabıletterdi qaıtarý, halyqaralyq júk tasymaldarynyń júrgizýshilerine vıza berý jáne t.b. máselelerge qatysty boldy.
