Úsharal – Dostyq jol ýchaskesiniń 90 shaqyrymy bıyl paıdalanýǵa beriledi
Qazir qurylys jumystarynyń sońǵy kezeńi júrip jatyr, joldyń barlyq aýmaǵy boıynsha qozǵalys qaýipsizdigi qamtamasyz etilgen.
«Úsharal – Dostyq baǵytyndaǵy respýblıkalyq mańyzy bar avtojoldyń 184 shaqyrymyn jańǵyrtý kózdelgen. Jobanyń quny – 61,2 mlrd teńge. Bas merdiger – «ABK-Avtodor NS» JShS.
Bul rette alǵashqy 87 shaqyrym boıynsha jol qozǵalysy 2020-2022 jyldary ashylǵanyn aıta keteıik. Búginde jumystar eki ýchaskede júrgizilip jatyr.
Máselen, qazir 90-120 shaqyrym aralyǵyndaǵy ýchaskede 31 shaqyrymnyń 30-ynda jabynnyń tómengi qabatyn tóseýge baılanysty jumystar aıaqtalyp, barlyq qubyr ornatyldy. Qazir jolshy mamandar jolǵa mastıkalyq-qıyrshyq tasty asfaltbetondy tósep jatyr. Atalǵan jumystar 16 shaqyrymnyń 14,2-sinde iske asyryldy. Sondaı-aq qardan qorǵaıtyn qorshaýlar, baspaldaqtar men tosqaýyl qorshaýlary ornatý qolǵa alyndy. Budan bólek Yrǵaıty ózeni arqyly ótetin kópirge arqalyqtar qoıylyp jatyr. Búginge deıin 50 arqalyqtyń 46 danasy ornatyldy», - dep jazdy Indýstrııa jáne ınfraqurylymdyq damý mınıstrliginen.
Ekinshi ýchaskege kelsek, 54,2 shaqyrymnyń 49,8 shaqyrymynda jabynnyń tómengi qabatyn ornatýǵa baılanysty jumystar aıaqtaldy. Barlyq sý ótkizý qubyrlary da salyndy. Qazir 10,73 shaqyrymnyń 6,25-ine jabynnyń joǵarǵy qabaty tóseldi. Sonymen qatar Toqty kópiriniń aralyq tirekterin armatýra salý arqyly nyǵaıtý, Shyndaly kópiriniń ústińgi taqtasyn quıý, buǵan qosa sý ótkizý qubyrlaryn kúsheıtý boıynsha jumystar iske asyrylyp keledi. Temirbeton materıaldary 100%-ǵa daıyn tur.
Merdigerdiń aıtýynsha, 90-180 shaqyrym aralyǵyndaǵy ýchaskeni bıyl jeltoqsanda paıdalanýǵa berý kózdelgen.
Budan basqa QR Qarjy mınıstrliginiń Memlekettik kirister komıteti men Ulttyq qaýipsizdik komıtetiniń Shekara qyzmetimen birlesip, Qazaqstan-Qytaı shekarasyndaǵy «Dostyq» ótkizý pýnktiniń qurylysyn aıaqtaý mejelengen.
