«Úsharal - Dostyq» tas joly aýa raıyna baılanysty jabyldy

TALDYQORǴAN. QazAqparat – «Úsharal - Dostyq» tas joly (84-184 shaqyrym, Kóktýma aýyly - Dostyq aýyly) aýa raıynyń qolaısyzdyǵyna baılanysty barlyq kólik túrleri úshin jabyldy, dep habarlaıdy QazAqparat Almaty oblystyq Tótenshe jaǵdaılar departamentiniń baspasóz qyzmetine silteme jasap.

«QazAvtoJol» UK AQ Almaty oblystyq bólimshesiniń málimetinshe, 17 jeltoqsanda saǵat 11:00-den bastap aýa raıynyń qolaısyzdyǵyna baılanysty (qatty boran, joldyń kórinbeýi) respýblıkalyq mańyzy bar «Úsharal - Dostyq» tasjoly (84-184 shaqyrym, Kóktýma aýyly - Dostyq aýyly) jabyldy», - delingen vedomstvonyń habarlamasynda.

Almaty oblystyq TJD azamattardyń osy baǵytqa jolǵa shyqpaýyn jáne 112 qyzmetiniń habarlamasyna nazar aýdarýdy suraıdy. Alys jolǵa shyqqanda aýa raıymen tanysyp, ekstremaldy jaǵdaıda qajet bolatyn zattardy alǵan jón.