Úsharal-Dostyq jolynda 5 kóliktiń soqtyǵysýy: QazAvtoJol júrgizýshilerge úndeý jasady
ASTANA. KAZINFORM - 2026 jylǵy 14 aqpan saǵat 13:30 shamasynda respýblıkalyq mańyzy bar KZ19-02 «Úsharal – Dostyq – QHR shekarasy (Dostyq shekara ótkeli)» avtojolynyń 98 shaqyrymyndaǵy Kóktýma eldi mekeni mańynda 5 jeńil avtokólik soqtyǵysty.
QAzAvtoJol mekemesiniń habarlaýynsha, apat saldarynan 6 adam túrli dárejede jaraqat alyp, Alakól aýdandyq aýrýhanasyna jetkizildi.
Oqıǵa bolǵan sátte atalǵan jol ýchaskesi qolaısyz aýa raıyna (boran, qatty jel jáne nóldik kóriný) baılanysty barlyq kólik túrleri úshin resmı túrde jabyq bolǵan. Shekteý 2026 jylǵy 13 aqpanda saǵat 12:00-de engizilip, sınoptıkter boljamyna sáıkes 17 aqpan saǵat 09:00-de ashý josparlanǵan.
Aldyn ala málimet boıynsha, bir baǵytta kele jatqan kólikter soqtyǵysqan. Jol apatyna ushyraǵan kólik ıeleri polıtsııa beketteri men engizilgen tyıymdy elemeı, dalalyq aınalma jolmen júrip, jabyq respýblıkalyq avtojoldyń ortasyna shyǵyp ketken.
Sonymen qatar apattyq-qutqarý jumystary barysynda jol qyzmetkerleri qar qursaýynda qalǵan 12 avtokólikti shyǵaryp, 9 adamdy qutqardy.
Osy rette QazAvtoJol ókilderi júrgizýshilerge úndeý jasady.
-Qurmetti jol qozǵalysyna qatysýshylar!
Jol qyzmeti mamandary:
•engizilgen qozǵalys shekteýlerin qatań saqtaýdy;
• jabyq ýchaskelerdi beıresmı jáne dalalyq joldarmen aınalyp ótpeýdi;
• jolǵa shyǵar aldynda joldyń jaı-kúıi men aýa raıy týraly aqparatty naqtylaýdy;
• boran men qatty jel kezinde alys sapardan bas tartýdy suraımyz,-delingen úndeýde.
Sondaı-aq onda ýaqytsha shekteýlerdi elemeý azamattardyń ómiri men densaýlyǵyna qaýip tóndirip qana qoımaı, qutqarý qyzmetteriniń jumysyn da kúrdelendiretini, joldaǵy qaýipsizdik - ár júrgizýshiniń jaýapkershiligi ekeni aıtylǵan.