Úsharal-Dostyq trassasy aqyly joldar qataryna kirýi múmkin
TALDYQORǴAN. KAZINFORM — Kólik mınıstrligi respýblıkalyq mańyzy bar Úsharal-Dostyq avtojolyn aqyly negizde paıdalaný týraly buıryq ázirlep, qoǵam talqysyna shyǵardy.
Jańa buıryqtyń jobasy «Ashyq NQA» portalyna jarııalandy.
Mınıstrliktegilerdiń usynǵan málimetine súıensek, 184 shaqyrymdyq respýblıkalyq mańyzy bar Úsharal-Dostyq avtojoly aqyly bolsa, jınalǵan qarajat tólem alynǵan joldyń kútimine jáne qyzmet kórsetý sapasyn jaqsartýǵa baǵyttalady. Alaıda tólem jasaý júrgizýshilerdiń bárine birdeı mindetti emes.
— Úsharal-Dostyq tas jolyn aqyly negizde paıdalaný josparlanyp otyr. Jeńil kólikter úshin jol aqysy alynbaıdy. Al júk kólikteriniń klasyna baılanysty 1240 teńgeden 6250 teńgege deıin aqy alynady. Eger júrgizýshi aldyn ala tólem jasaıtyn bolsa, jeńildikter qarastyrylǵan. Respýblıkalyq mańyzy bar avtomobıl joldaryna tólemdi engizýdegi maqsat ony damytýǵa salynǵan qarajatty saqtap qalý úshin, normatıvtik jáne sapalyq kútimin qamtamasyz etý úshin. Aqyly joldardaǵy tarıf qunynyń ósýi olardyń kútimin qarjylandyrý úshin qajetti normatıvke qol jetkizýdi eskere otyryp eseptelgen, — dedi QR Kólik mınıstrliginiń baspasóz qyzmeti.
Aıta keteıik, Úsharal-Dostyq avtojoly elimizdi Qytaı Halyq Respýblıkasymen baılanystyrady.
Eske salaıyq, osyǵan deıin «QazAvtoJol» joldyń taıǵaqtyǵyna shaǵymdanǵan júrgizýshilerge jaýap bergenin jazǵanbyz.