«Úsharal — Dostyq» avtojolyndaǵy qardan qorǵaıtyn qorshaýlar qırap qalǵan

ASTANA. KAZINFORM — «QazAvtoJol» ulttyq kompanııasy áleýmettik jelilerde taraǵan «Úsharal — Dostyq» avtojolyndaǵy qardan qorǵaıtyn qorshaýlardyń qıraǵany týraly aqparatqa qatysty resmı túsinikteme berdi.

Kompanııa málimetinshe, qardan qorǵaıtyn qorshaýlar respýblıkalyq mańyzy bar «Úsharal — Dostyq» avtojolynyń 111–114 shaqyrymynda ornatylǵan. Qurylys jumystaryn «Kazdorproekt» JShS jobalyq-smetalyq qujattamasyna sáıkes merdiger uıym «ABK-Avtodor NS» JShS atqardy. Ornatylǵan qorshaýdyń jalpy uzyndyǵy — 3300 metr, eki qatar, normatıvtik talaptarǵa saı. Atalǵan nysan 2023 jylǵy 2 qazanda paıdalanýǵa berildi.

— Alaıda sol jyldyń 15 qarashasynda jyldamdyǵy sekýndyna 34 metrge jetken daýyldy jel saldarynan qorshaýdyń bir bóligi búlinip qaldy. Bul jaǵdaı tıisti tekserý aktilerimen, «Qazgıdromet» RMK resmı qorytyndysymen jáne Qazaqstandyq jol ǵylymı-zertteý ınstıtýtynyń zerthanalyq saraptamasymen rastaldy. Atalǵan avtojol ýchaskesi merdiger uıymnyń kepildik qyzmet merzimine kiredi. «ABK-Avtodor NS» JShS-ne resmı talaptar joldanyp, búgingi kúni kepildik mindettemeler aıasynda anyqtalǵan kemshilikterdi joıý boıynsha sharalar qoldanylyp jatyr, — delingen habarlamada.

«QazAvtoJol» UK» AQ barlyq anyqtalǵan aqaý merdiger uıymnyń óz mindettemelerin tıisinshe oryndamaýyna baılanysty ekenin jáne ulttyq kompanııanyń qyzmetine qatysy joq ekenin atap ótti. Ulttyq kompanııa kepildik mindettemelerdiń oryndalýyna turaqty baqylaý júrgizip, «Úsharal — Dostyq» avtojolynyń osy ýchaskesinde qardan qorǵaıtyn qorshaýlardyń tolyq qalpyna keltirilýin qamtamasyz etpek.

Osyǵan deıin Qazaqstanda aqyly avtojoldardy tegin paıdalanatyn kólik sanattary belgili boldy.