Úsharal áýejaıy men Aqshı aýylynyń arasyna arnaıy avtobýs qatynamaq
ASTANA. KAZINFORM — Alakól kóline kólikpen jetý múmkindikteri jyldan jylǵa jaqsaryp keledi. Bul rette jýyrda Úsharal áýejaıy men Aqshı aýyly arasyna oblys ákimdigi tarapynan sýbsıdııalanatyn arnaıy avtobýs marshrýty qatynaıtyn bolady. Bul týraly Jetisý oblysy ákiminiń baspasóz qyzmeti málim etti.
Sońǵy jyldary Úsharal qalasy baǵytynda áýe reısteriniń sany artty. Endi Alakólge kún saıyn Astana jáne Almaty qalalarynan «Almaty-Úsharal» jáne «Astana-Úsharal» baǵyttary arqyly jetýge bolady. Memleket tarapynan sýbsıdııalanǵan bıletter quny — nebári 20 000 teńge. Áýejaı qazir saǵatyna 50 jolaýshy ótkizýge qabiletti.
— 2022 jyly áýejaıdyń ushyp-qoný jolaǵy qaıta jańǵyrtylyp, betki qabaty 52 sm qalyńdyqtaǵy tsement-betonmen nyǵaıtyldy. Sonyń arqasynda iri áýe kemelerin qabyldaýǵa múmkindik jasaldy. Qazir Astana, Almaty qalalary men Úsharaldyń arasynda sýbsıdııalanatyn maýsymdyq áýe qatynasy kúndelikti júredi. Áýejaı jumysy jalpy Alakól aýdanynyń týrıstik áleýetin arttyrýǵa úlken yqpal etip otyr, — deıdi «Jetisý» avıakompanııasy» AQ Úsharal qalasy áýejaıynyń dırektory Aıdyn Baıbazarov.
Sol sııaqty jazǵy shomylý maýsymyna qaraı qosymsha poıyzdar iske qosyldy. Kólge 13 poıyz júredi, onyń ishinde Astana men Almatydan shyǵatyn «Talgo» júrdek poıyzy da bar. Oǵan qosa Óskemen, Pavlodar, Qyzylorda, Semeı jáne Aqtoǵaı baǵyttary qosyldy.
Sondaı-aq Aqshı jáne Kóktuma aýyldaryna avtobýs marshrýttary uıymdastyryldy. Almatydaǵy «Saıran» jáne Taldyqorǵandaǵy avtobeketterden avtobýstar turaqty júredi. Bılet quny 5 000 teńge men 9 000 teńgeniń aralyǵynda.
Bir atap óterligi, jýyrda Úsharal áýejaıy men Aqshı aýylynyń arasyna avtobýs qatynaıtyn bolady.
— Alakól jaǵalaýyndaǵy jekelegen qonaq úıler bolmasa, kópshilik demalys oryndarynda transfer qarastyrylmaǵandyqtan, týrıster tarapynan jıi aıtylatyn máseleniń biri Úsharal áýejaıy men Aqshı aýylynyń arasynda avtobýs qatynasy jaıy bolatyn. Bul másele sheshimin tapty. Oblys ákimdiginiń qoldaýymen sýbsıdııalanatyn avtobýs marshrýty shyǵarylady. Qazir konkýrs rásimderi aıaqtaldy. Jaqyn kúnderde avtobýs júre bastaıdy, — dedi Alakól aýdanynyń ákimi Almas Ábdınov.
Eske salsaq, sońǵy jyldary «Taldyqorǵan — Úsharal», «Úsharal — Dostyq» avtojoldary qaıta jańǵyrtylyp, qoldanysqa berilgen bolatyn.
Eske sala ketıik, buǵan deıin Alakól baǵytyndaǵy vokzaldar jóndelip, Aqshı stantsııasynyń beketi táýlik boıy jumys isteıtinin jazǵan edik.