Ushaqtyń shýyldaǵan daýysy ınfarktige ákep soqtyrýy múmkin
ASTANA. 10 qazan. QazAqparat - Ushaqtyń shýyldaǵan daýysynyń estilý deńgeıi joǵary aýdandarda turatyn adamdardyń ınfarkt nemese ınsýltqa ushyraý qaýpi joǵary. Bul týraly Londondaǵy Imper kolledjiniń qyzmetkerleriniń málimdemesine silteme jasap Bı-Bı-Sı habarlaıdy.
Ǵalymdar Hıtroý áýejaıyna jaqyn jerde turatyn 3 mln 600 myń eriktini synaqqa salyp, densaýlyq jaǵdaıyn qadaǵalaǵan. Olar basqa aýdandar turǵyndaryna qaraǵanda ınfartqa 10-20%-ǵa artyq ushyraıtyn bolyp shyqty.
Sonymen qatar, mamandar tek ushaqtyń shýyldaǵan daýysy ǵana júrek-qan tamyrlary aýrýyna sebep bolady dep sendirmeıdi, basqa da faktorlar sebep bolady (shylym shegý, denege salmaq túsirmeý jáne durys tamaqtanbaý), sondyqtan qosymsha tekserilý qajet.
"Biz ázirge ushaqtyń shýyldaǵan daýysy densaýlyq jaǵdaıyna ne sebepti áser etetinin anyqtaǵan joqpyz. Bul arterııa qysymynyń kóterilýine nemese uıqynyń buzylýyna baılanysty bolýy múmkin. Kútpegen jerden estilgen qatty shýyldaǵan daýys adamdardy shoshytady, al ol qysymnyń túsýine áser etedi jáne qaýipti aýrýlardyń qozýyn órshitedi", - dep túsindiredi zertteý avtory Anna Hensell.
"Biz ushaqtyń shýyldaǵan daýysymen kúresý sharalaryn qabyldamaqpyz jáne az shýyldaıtyn áýe kólikterin engize otyryp, ony azaıtýǵa tyrysamyz. Sondaı-aq, jaqyn ornalasqan aýdandar turǵyndaryna qos qabattalǵan áınekti terezeler ornatýǵa keńes beremiz", - deıdi Hıtroý áýejaıynyń ókili Mett Gorman.
