Ushaqtyń tóbesinde oınap júr: Aqtóbelikter áli ashylmaǵan skverdi qıratyp jatyr
AQTÓBE. KAZINFORM - T. Bıgeldınov atyndaǵy áýe qorǵanysy kúshteri áskerı ınstıtýty janynda salynyp jatqan skver byltyr qoldanysqa berilýi tıis edi. Merdiger men ákimdik arasynda sot bolyp, qurylys áli aıaqtalmaı tur. Al aqtóbelikter bolsa múlikti qıratýǵa kóshken.
Aqtóbe qalasyndaǵy áıgili áskerı ınstıtýt janynda turǵan jańa skver kópti ózine tartady. Munda ushaqtar men tikushaqtar tur. Bári de bir kezderi áskerı maqsatta qoldanylǵan. Bul oryn buryn Otan qorǵaýshylar kúni ashylyp, tanymdyq shara ótkizetin jer bolsa, ákimdik sońǵy jyldary jerdi alyp, demalys ornyn ashýdy josparlady. Bul jerdegi qurylys byltyr aıaqtalýy tıis bolatyn.
— «Ushqyshtar ýchılışesi skverin» abattandyrýy tıis merdiger uıym — «Megastroıspektr» JShS. Kelisimshartqa sáıkes jumystar 2023 jyldyń jeltoqsanynda aıaqtalýy kerek edi. «Megastroıspektr» JShS jumysty merziminde aıaqtamaı, Aqtóbe qalalyq turǵyn úı-kommýnaldyq sharýashylyq bólimi memlekettik satyp alýǵa qatysýǵa laıyqsyz dep taný jáne turaqsyzdyq aıybyn óndirip alý úshin sotqa talap aryz berdi. Budan soń merdiger jumystardy bıyl aıaqtaý týraly mindetteme aldy. Qazirgi ýaqytta jumysty jalǵastyrýǵa daıyndyq júrgizilip jatyr. Qala turǵyndarynan jumystar aıaqtalǵanǵa deıin alańǵa barmaýyn, sondaı-aq ol jerde turǵan múliktiń búlinýine jol bermeýdi suraımyz. Eger sizder vandaldyq áreketterdiń kýási bolsańyz, bul týraly dereý polıtsııaǵa habarlaýyńyzdy suraımyz», — dep habarlady Aqtóbe qalasy ákiminiń baspasóz qyzmeti.
Aıta keteıik, bul jerge balalardyń oıyn alańy salynyp, adamdar júrýge arnalǵan jolǵa ishinara tas tóselgen. Qoqys jáshikteri de qoıylǵan. Joba quny — 130 mln teńge.
Aqtóbe qalasyndaǵy skverge kirý esigi jabyq turǵanymen, qorshaýdyń ketik jerinen ońaı ótýge bolady. Munda kelgen otbasylar balalaryn ushaq, tikushaq ishine kirgizip, tipti tóbesine minýge, qanatynda júrýge ruqsat berip qoıǵan. Munda polıtsııa, kúzet te kórinbeıdi.
