Ushaqty muzdan tazartý nege jolaýshylar otyrǵyzylǵannan keıin júrgiziledi
ASTANA. KAZINFORM – Kólik mınıstrliginiń Azamattyq avıatsııa komıteti áýe kemelerin muzdan tazartýdyń negizgi kezeńderi men qaýipsizdik talaptaryn atap ótti.
Áýe kemelerin muzdan tazartý (deaısıng) — ushaqty qaýipsiz ushyrý úshin júrgiziletin daıyndyqtyń asa mańyzdy bóligi. Halyqaralyq standarttar men azamattyq avıatsııa salasyndaǵy ishki normatıvtik talaptardy saqtaý áýe kompanııalar men áýejaılar úshin basty basymdyq.
— Qys mezgilinde muzdaný qaýpi aıtarlyqtaı artady. Ushaq qanatynda nemese basqa da mańyzdy betterde paıda bolǵan muzdyń, qyraýdyń nemese qardyń juqa qabatynyń ózi áýe kemesiniń aerodınamıkalyq qasıetterin nasharlatyp, aýa kedergisin arttyryp, kóterý kúshin azaıtady. Bul ushý sıpattamalarynyń tómendeýine alyp keledi, — delingen habarlamada.
Osy sebepti halyqaralyq tájirıbe men ulttyq rásimderde mindetti túrde muzdan tazartý qoldanylady.
Ol ádette bir nemese eki kezeńde júrgiziletin arnaıy suıyqtyqty qoldanýdy qamtıdy:
1. Áýe kemesiniń mańyzdy betterinen muzdy, qardy, qyraýdy jáne basqa da lastanýlardy ketirý.
2. Qaıta muzdanýdyń aldyn alý úshin belgili bir ýaqyt ishinde áser etetin qorǵanys qabatyn jaǵý.
— Belsendi jaýyn-shashyn men tómen temperatýra jaǵdaıynda reısterdiń ushyp shyǵýy kidirýi múmkin. Bul áýe kemesin óńdeýdi sapaly oryndaý jáne suıyqtyqtyń áseri ushý-qoný jolaǵyna shyqqanǵa deıin saqtalýyn qamtamasyz etý qajettiligimen baılanysty. Mundaı kidirister ushý qaýipsizdigin qamtamasyz etýdiń mańyzdy bóligi, — dedi vedomstvoda.
Nege óńdeý jolaýshylar otyrǵyzylǵannan keıin bastalady
— Muzdan tazartý rásimi jolaýshylar tolyq otyrǵyzylyp, áýe kemesiniń barlyq esigi jabylǵannan keıin júrgiziledi. Bul talaptyń negizgi sebebi, muzdanýǵa qarsy suıyqtyqtyń áser etý ýaqytynyń shekteýli bolýynda. Qorǵanys qabatynyń tıimdiligin barynsha arttyrý jáne onyń ushyp shyqqanǵa deıin saqtalýyn qamtamasyz etý úshin óńdeý múmkindiginshe ushý ýaqytyna jaqyn jasalýy tıis, — delingen habarlamada.
Esikterdi jabý muzdan tazartý protsedýralarynyń tehnologııalyq talaptaryna da sáıkes keledi. Jolaýshylar otyrǵyzylyp, esikter jabylǵannan keıin ushaq turaqta qala beredi nemese arnaıy muzdan aryltý alańyna jetkiziledi.
— Aýa raıy jaǵdaıyna baılanysty óńdeý birden nemese jaǵdaı jaqsarǵan kezde oryndalady. Mundaı tehnologııalyq kútý — ushý qaýipsizdigin qamtamasyz etýge baǵyttalǵan halyqaralyq jáne ulttyq rásimderdiń mindetti bóligi. Barlyq jolaýshylarǵa túsinistik pen shydamdylyq tanytqany úshin alǵys aıtamyz, — delingen vedomstvo habarlamasynda.
Aıta ketelik Astana áýejaıy halyqaralyq standarttardy saqtaı otyryp, tsıfrlyq jańalyq engizgen edi.