Ushaqtardy qustardan kim qorǵaıdy: Qazaqstan áýejaılarynda arnaıy mamandar bar ma
ASTANA. KAZINFORM – Qazaqstan áýejaılarynda qustardy baqylaý jáne ushý qaýipsizdigin qamtamasyz etý úshin arnaıy qyzmet uıymdastyrylady nemese osy jumysqa jaýapty mamandar taǵaıyndalady. Bul týraly Qazaqstannyń avıatsııalyq ákimshiligi Kazinform agenttiginiń resmı saýalyna bergen jaýabynda málimdedi.
Vedomstvonyń túsindirýinshe, mundaı jumysty uıymdastyrý tártibi áýejaıdyń kólemine, kúrdeliligine, ushý qarqyndylyǵyna jáne qustarmen soqtyǵysý qaýpiniń deńgeıine baılanysty aıqyndalady.
– Osyǵan baılanysty áýejaıda arnaıy qyzmet uıymdastyrylady nemese ornıtologııalyq qaýipsizdikti qamtamasyz etýge jaýapty mamandar taǵaıyndalady. Atalǵan qyzmetkerler bastapqy jáne merzimdi daıarlyqtan ótýge tıis. Olar ushý qaýipsizdigin ornıtologııalyq qamtamasyz etý talaptaryn, áýeaılaqta jumys isteý kezindegi qaýipsizdik erejelerin jáne radıobaılanys qaǵıdalaryn bilýi qajet, - delingen jaýapta.
Máselen, Nursultan Nazarbaev halyqaralyq áýejaıynda ornıtologııalyq qaýipsizdikti qamtamasyz etetin arnaıy qyzmet bar. Onyń quramynda qyzmet basshysy men alty ornıtolog jumys isteıdi. Olar áýejaı aýmaǵyndaǵy qustardyń qozǵalysyn táýlik boıy baqylap, ushý-qoný jolaǵy men oǵan jaqyn jerlerdi tekseredi.
Áýejaıdyń Kazinform agenttigine bergen jaýabyna sáıkes, mamandar tekserý ýaqytyn jáne júretin baǵytyn ádeıi ózgertip otyrady. Bul qustardyń olardyń áreketine úırenip ketpeýi úshin qajet.
Sonymen qatar mamandar áýejaıdyń jumys erekshelikterin meńgerip, qustardyń qaýipti shoǵyrlanýy anyqtalǵan jaǵdaıda qandaı áreket jasaý kerektigin bilýge mindetti.
Osylaısha, áýejaılarda ornıtologııalyq qaýipsizdikti qamtamasyz etý jumystary arnaıy uıymdastyrylǵan qyzmetke nemese osy mindet júktelgen mamandarǵa tapsyrylady.
Elimizde ushaqtar kóbinese qandaı qustarmen soqtyǵysatynyn jazǵan edik.
