Ushaqtar tolyǵymen otandyq kerosınmen qamtamasyz etilmek - mınıstr Qasymbek
ASTANA. QazAqparat - QR Investıtsııalar jáne damý mınıstri Jeńis Qasymbektiń aıtýynsha, búginde otandyq munaı óńdeý zaýyttary azamattyq avıatsııany kerosınmen tek 30 paıyzǵa ǵana qamtamasyz etip otyr, dep xabarlaıdy QazAqparat tilshisi.
«Áýe kerosıniniń qalǵan bóligi Reseı aýmaǵynan qymbat baǵaǵa jetkiziledi. Sebebi tasymaldaý shyǵyndary bar. Kelesi jyly Qazaqstannyń munaı óńdeý zaýyttaryn jańǵyrtý jumystary aıaqtalady. Energetıka mınıstrliginiń málimetine sáıkes, sol kezde kerosınniń barlyǵy, ol shamamen 800 myń tonnasy óz jerimizde óndiriledi», - dedi Qasymbek Úkimettiń búgingi otyrysynda.
Mınıstrdiń aıtýynsha, búginde azamattyq avıatsııa salasyndaǵy jolaýshylar men júkter tasymaly artyp keledi.
