Ushaqta jolaýshylardy balaǵattaǵan brıtandyqqa aıyppul salyndy
NUR-SULTAN. QazAqparat - Kólik polıtseıleri «London - Nur-Sultan» baǵytyndaǵy áýe reısinen ákimshilik quqyqbuzýshylyq jasaǵan 24 jastaǵy Ulybrıtanııa azamatyna aıyppul salyndy, dep habarlaıdy QazAqparat tilshisi.
«Nur-Sultan qalasy áýejaıyndaǵy jelilik polıtsııa kezekshi bólimine «Eır Astana» AQ ókilinen «London - Nur-Sultan» baǵytyndaǵy áýe kemesinde quqyq buzýshy bar ekendigi týraly habarlama kelip tústi. Kólik polıtseılerimen tekserý barysynda 24 jastaǵy Ulybrıtanııa azamaty anyqtaldy. Er adam áýe kemesinde bolý erejesin buzǵany, ıaǵnı jolaýshylar men bortserikterdi balaǵattaǵany úshin áýe kemesinen túsirilgen. Bortseriktiń jazbasha eskertýine jolaýshy ózin dóreki ustap óziniń aǵylshyn tilinde oqı almaıtynyn aıtyp, basqa jolaýshylardy qorlap, ushaq bortynda eshkimge qulaq aspaı, qaýipsizdik erejesin saqtamaı qarsylyq kórsetken. Oǵan qosa quqyqbuzýshy jandaldasyp, bortserikterdiń eskertýlerine eregese jaýap berip, olardyń qyzmet kórsetýlerine kedergi keltirgen», - delingen Kóliktegi polıtsııa departamenti baspasóz kyzmetiniń málimetinde.
Budan keıin atalǵan azamattyń ústinen QR ÁQBtK 566-babynyń 1- tarmaǵy boıynsha ákimshilik hattama toltyrylyp, áýe kemesindegi jol júrý erejelerin buzǵany úshin Ulybrıtanııalyq jolaýshyǵa 3 AEK kóleminde aıyppul salyndy. Sonymen qatar, atalǵan azamattyń ústinen QR ÁQBtK 434-baby boıynsha taǵy bir ákimshilik is qozǵaldy - «Usaq quqyqbuzýshylyq».
Nur-Sultan qalasynyń mamandandyrylǵan aýdanaralyq ákimshilik sotynyń sheshimimen 5 AEK kóleminde ákimshilik aıyppul salyndy.
