Ushaqta temeki tartqan qazaqstandyq 150 myń teńge aıyppul tóleýi múmkin
NUR-SULTAN. QazAqparat – Ushaq bortynda temeki tartqan qazaqstandyq 150 myń teńgeden astam aıyppul tóleýi múmkin. Bul týraly Kóliktegi polıtsııa departamenti baspasóz qyzmetinen málim boldy, dep habarlaıdy QazAqparat.
«Aqtóbe qalasy áýejaıynda polıtsııanyń jelilik bóliminiń qyzmetkerleri 19 jastaǵy Qazaqstan azamatyn ustady. Jas jigit «Almaty-Aqtóbe» baǵdaryndaǵy áýe reısinde temeki tartqan. Sonymen qatar ol ushaqtaǵy talaptardy saqtamaǵan, ıaǵnı ushaq komandıri men ekıpaj músheleriniń nusqaýlaryn oryndamaı, balaǵat sóz aıtqan. Osy arqyly ol qoǵamdyq tártipti buzǵan», - delingen departament málimetinde.
Ushaqtaǵy tártipti buzǵan jigitke qatysty ákimshilik úsh hattama toltyryldy. Osy oraıda áýe kemesi bortynda temeki tartý, ushaqtaǵy tártipti buzý jáne usaq buzaqylyq aıyptary taǵylyp, 53 AEK kóleminde ákimshilik aıyppul salyndy. Usaq buzaqylyq boıynsha materıal sotqa jiberildi.
