Ushaqta tártip buzǵandarǵa qandaı jaza qoldanylady
ASTANA. QazAqparat - QR Investıtsııalar jáne damý mınıstrliginiń Azamattyq avıatsııa komıteti áýe kemesi bortynda quqyq buzǵan jolaýshylarǵa salynatyn aıyppul túrlerin jarııalady, dep habarlaıdy QazAqparat.
«QR Ákimshilik quqyqbuzýshylyqtar kodeksine sáıkes, áýe kemesinde tártip buzǵan jolaýshylarǵa qoldanylatyn sharalar ınfografıkasyn usynyp otyrmyz. Atap aıtqanda, ushý, qoný jáne burylý kezinde orynnan turyp, salon ishinde júrgender men dálizde turǵan jolaýshylarǵa 3 AEK kóleminde aıyppul salynady. Áýe kemesi bortynda shylym shekken jolaýshyǵa 200 AEK aıyppul nemese 15 táýlikke ákimshilik tutqynǵa alý jazasy qarastyrylǵan»,- dep jazylǵan Azamattyq avıatsııa komıtetiniń áleýmettik jelidegi resmı paraqshasynda.
Sondaı-aq, ushýǵa nemese jolaýshylar men ekıpajdyń densaýlyǵyna, ar-namysyna zaqym keltirý qaýpi týǵan jaǵdaıda, jeke tulǵaǵa 200 AEK kóleminde aıyppul nemese 15 táýlikke ákimshilik tutqynǵa alý jazasy taǵaıyndalady.
«Ushaq bortynda kez kelgen balaǵattaý, zorlyq-zombylyq nemese qorqytý men úrkitýge jol berilmeıdi. Bul úshin 10 AEK kóleminde aıyppul nemese 10 táýlikke ákimshilik qamaýǵa alý jazasy beriledi. Ózgeniń múlkine qasaqana zaqym keltirgender nemese áýe kemesinen alyp ketkender, ushqyshtar kabınasyna kirýge árekettengender de 200 AEK aıyppul nemese 15 táýlikke ákimshilik qamaý jazasyn alady.
