Ushaqta shylym shekken áıel jolynan qaldy
ASTANA. QazAqparat - «Almaty-Qaraǵandy» baǵytyndaǵy áýe reısinen ushaq bortynda temeki shekken 32 jastaǵy kelinshek borttan túsirildi, dep habarlaıdy QazAqparat.
«Qaraǵandy qalasy áýejaıynyń jelilik polıtsııa bólimine «Eır Astana» áýe kompanııasynyń «Almaty-Qaraǵandy» baǵytynda qatynaıtyn áýe kemesi bortynda quqyq buzýshy bar ekendigi týraly habarlama túsken. Kólik polıtsııasynyń tekserýi barysynda áýe kemesiniń bortynda Qaraǵandy qalasynyń 32 jastaǵy azamatshasynyń temeki shekkeni anyqtaldy. Ol osy áreketi arqyly ushý qaýipsizdigi erejesin buzǵan. Áýe kemesi komandıriniń aktisimen ol reısten túsirildi»,- delingen Kóliktegi polıtsııa departamentiniń habarlamasynda.
Dál osyndaı taǵy bir oqıǵa da Almaty áýejaıynda tirkelgen. Onda da «Eır Astana» áýe kompanııasynyń ushaǵynda temeki shekken sheteldik azamat jazaǵa tartylǵan.
«Quqyq buzýshy Ózbekstan Respýblıkasynyń 39 jastaǵy azamaty bolyp shyqty. Ol «Ystanbul-Almaty-Tashkent» baǵytyndaǵy áýe kemesiniń bortynda temeki shekken. Áýe kemesi komandıriniń aktisimen ol reısten túsirildi. Bul faktiler boıynsha kólik polıtsııasynyń qyzmetkerleri ákimshilik hattama toltyryp, atalǵan quqyq buzýshylardy QR Ákimshilik quqyq buzýshylyq týraly kodeksiniń 564-baby 5-tarmaǵy boıynsha ákimshilik jaýapkershilikke tartý úshin ony QR IIDM Azamattyq avıatsııa komıtetine jiberdi», - dedi departamentten.
Aıta keteıik, QR Ákimshilik quqyq buzýshylyq týraly kodeksiniń atalǵan babyna sáıkes kináli tulǵa 200 AEK kóleminde aıyppul tóleıdi nemese 15 táýlikke ákimshilik qamaýǵa alynady.
