Ushaqta ózin jaısyz sezingen eki jolaýshy Oraldaǵy aýrýhanaǵa jetkizildi

ORAL. KAZINFORM – Almatydan Oralǵa bet alǵan «Eır Astana» áýe kompanııasynyń ushaǵynda ózin jaısyz sezingen eki jolaýshy Oraldaǵy aýrýhanaǵa jetkizildi.

Atalmysh ushaq M.Mámetova atyndaǵy Oral halyqaralyq áýejaıyna 30 sáýir kúni saǵat 22.25-te qonǵan. 

Jolaýshylardyń sózine qaraǵanda, ushý kezinde eki adamnyń qyzýy kóterilip, qusqan. 

BQO juqpaly aýrýlar aýrýhanasynyń dırektory Nadııa Ahmetovanyń aıtýynsha, keshe túnde reseılik eki azamat osynda jetkizilgen. 

«Anamnez, epıdanamnez alynyp, dárigerler qaraǵannan keıin atalǵan eki adamnan tyrysqaq anyqtalmady. Ekeýiniń de jaǵdaıy qanaǵattanarlyq. Olar Saratov oblysyndaǵy turǵylyqty mekenjaıyna attanyp ketti», dedi N.Ahmetova.

Eske sala keteıik, budan buryn Oralǵa bet alǵan ushaqta júregi ustaǵan jolaýshyǵa kómektesken dárigerdiń kim ekeni anyqtalǵanyn jazǵan bolatynbyz.