«Ushaqta bomba bar»: Elorda áýejaıynda aıǵaılaǵan jolaýshy qamaýǵa alyndy

NUR-SULTAN. QazAqparat - Elorda áýejaıynyń ǵımaratynda «ushaqta bomba bar» dep aıǵaılaǵan jolaýshy qamaýǵa alyndy, dep habarlaıdy QazAqparat Polisia.kz saıtyna silteme jasap.

21 tamyz saǵat 10.00-de Nur-Sultan qalasynyń áýejaıyndaǵy jelilik polıtsııa bólimine Nursultan Nazarbaev halyqaralyq áýejaıy termınalynyń sterıldi aımaǵynda Nur-Sultan – Antalıa reısine jolaýshylardy otyrǵyzý kezinde 44 jastaǵy jolaýshy birneshe ret «ushaqta bomba» dep aıǵaılaǵany týraly habarlama túsken. Er adam mas kúıde bolǵan.

«Áýejaıdyń borty men sterıldi aımaǵy dereý tekserildi. Onyń barysynda qandaı da bir jarylǵysh qurylǵylar men basqa da tyıym salynǵan zattar tabylǵan joq. Atalǵan fakti boıynsha QR Qylmystyq kodeksiniń 273-babymen (Terrorızm aktisi týraly kórineý jalǵan habarlaý) sotqa deıingi tergeý bastaldy.

QR Qylmystyq kodeksiniń osy babyna sáıkes bes jylǵa deıin bas bostandyǵynan aıyrý kózdelgen. Kúdikti óz kinásin moıyndady. Qazirgi ýaqytta ol Nur-Sultan qalasy Polıtsııa departamentiniń ýaqytsha ustaý ızolıatoryna qamaldy. QR QPK-niń 201-babynyń talaptaryna sáıkes, ózge málimetter tergeý múddesine oraı jarııa etilmeıdi», - delingen polıtsııa habarlamasynda.

Aıta keteıik, 23 tamyz kúni astanada birneshe ǵımaratqa «bomba» qoıylǵany týraly habarlanǵan bolatyn.