Ushaqta bomba bar dep ázildegen jigittiń ústinen qylmystyq is qozǵaldy
ORAL. KAZINFORM — Áleýmettik jelide Almaty – Oral baǵytynda ushatyn ushaq bortynda túsirilgen beınejazba tarady.
Jas jigit bomba qoıylǵany týraly áleýmettik jelide ázildemekshi bolǵan. Osyǵan baılanysty bortty áýe kúzetiniń ókilderi kınologtarmen birge kelip teksergen.
Sodan keıin jas jigitti ushaq bortynan túsirip, alyp qalǵan.
Beınejazbada onyń kózine jas alyp, qapalanǵany anyq kórinedi. Ushaq bir saǵatqa keshigip ushqan.
ІІM Kóliktegi polıtsııa departamentiniń baspasóz qyzmetinen túsken málimetke qaraǵanda, atalmysh oqıǵaǵa baılanysty terrorızm aktisi týraly kórineý jalǵan habarlaý boıynsha QR QK 273-babyna sáıkes sotqa deıingi tergeý amaldary júrgizilip jatyr.
«Ózge aqparat QR Qylmystyq-protsestik kodeksiniń 201-babynyń talaptaryna sáıkes jarııa etýge jatpaıdy», dep habarlady vedomstvodan.
Atalǵan bap boıynsha aıypty dep tanylǵan adam bes myń aılyq eseptik kórsetkish mólsherinde aıyppul salýǵa ne sol mólsherde túzeý jumystaryna ne bes jylǵa deıingi merzimde bas bostandyǵyn shekteýge ne sol merzimge bas bostandyǵynan aıyrýǵa jazalanady.
Eske sala keteıik, budan buryn Oralǵa bet alǵan ushaqta júregi ustaǵan jolaýshyǵa kómektesken dárigerdiń kim ekeni anyqtalǵanyn jazǵan bolatynbyz.