Ushaqta aıtylǵan bir sóz reısti eki saǵatqa keshiktirdi
ASTANA. KAZINFORM — Kúndelikti ómirde keıbir sózder jaı ǵana áńgime barysynda nemese ázil retinde aıtylýy múmkin. Alaıda ushaq bortynda olardyń maǵynasy múldem basqasha qabyldanady.
Kólik mınıstrliginiń baspasóz qyzmeti atap ótkendı, avıatsııada «bomba», «jarylys», «terrorıst», «qarý», «basyp alý» sııaqty sózder jáne basqa da osyǵan uqsas málimdemeler qaýipsizdikke tóngen qaterdi bildirýi múmkin. Yqtımal qaýip týraly kez kelgen aqparatqa barynsha baıyppen qaralady, al ekıpaj ben avıatsııalyq qaýipsizdik qyzmetteri belgilengen rásimderge sáıkes áreket etýge mindetti.
— Mysaly, Almaty — Aqtaý baǵytyndaǵy reısinde jolaýshylardyń biri «bomba» degen sóz aıtqan. Oqıǵaǵa dereý avıatsııalyq qaýipsizdik qyzmetkerleri men kóliktik polıtsııa qyzmetkerleri tartylyp, er adam reısten túsirildi. Nátıjesinde reıstiń ushýy eki saǵatqa jýyq ýaqytqa keshiktirildi, — delingen habarlamada.
Bul shamadan tys reaktsııa sııaqty kórinýi múmkin. Biraq avıatsııa salasynda olaı emes. Ekıpaj mundaı sózdiń ázil, abaısyzda aıtylǵan sóz nemese naqty qaýip týraly aqparat ekenin birden anyqtaı almaıdy.
— Sondyqtan osyndaı kez kelgen málimdeme jasalǵan jaǵdaıda avıatsııalyq qaýipsizdikti qamtamasyz etý rásimderi dereý iske qosylady: áýe kemesi men bagaj tekseriledi, arnaıy qyzmetter tartylady, qajet bolǵan jaǵdaıda jolaýshylar evakýatsııalanýy nemese áýejaıdyń jekelegen aımaqtaryna kirý shektelýi múmkin. Nátıjesinde áýe kemesin nemese ekıpajdy aýystyrý, reısti keıinge qaldyrý jáne jolaýshylarǵa qaıta qyzmet kórsetý qajettiligi týyndaýy múmkin. Munyń barlyǵy áýe kompanııa men áýejaı úshin qosymsha shyǵyndarǵa ákeledi, — dep túsindirdi mınıstrlik.
Qazaqstanda QR Qylmystyq kodeksiniń 273-babyna sáıkes terrorızm aktisin jasaýǵa daıyndalyp jatqany týraly jalǵan habarlama jasaǵany úshin aıyppul, túzeý jumystary nemese bas bostandyǵyn shekteý jazasy kózdelgen. Ushaqta jáne áýejaıda sebepsiz bomba, jarylǵysh zat, qarý, tapansha, terrorıster, terrorızm aktisi, áýe kemesin basyp alý týraly, sondaı-aq jolaýshylarǵa nemese ekıpajǵa zııan keltirý nıeti, bagajda nemese qol júginde qaýipti zattardyń bar ekeni týraly sózder aıtýǵa jáne mundaı taqyrypta ázildeýge bolmaıdy. Munyń «ázil retinde» nemese shyn nıetpen aıtylǵany mańyzdy emes. Eger aıtylǵan sóz yqtımal qaýiptiń bar ekenin kórsetse, avıatsııalyq qaýipsizdik qyzmetkerleri oǵan tıisti deńgeıde den qoıýǵa mindetti.
Jolaýshylar mynany este ustaýy kerek: bir ǵana abaısyzda aıtylǵan sóz óz reısiniń keshigýine ǵana emes, júzdegen jolaýshy men ekıpajǵa qolaısyzdyq týǵyzyp, áýejaı jumysyna da áser etýi múmkin.
Buǵan deıin Almaty áýejaıynda sheteldik jolaýshy «bagajymda bomba bar» ekenin aıtqan.
