Ushaqta aınalasyndaǵylarǵa til tıgizgen boıjetken jaýapqa tartyldy
ALMATY. QazAqparat - Almaty áýejaıynda Kýala-Lýmpýrǵa ushatyn ushaqta mas kúıde aınalasyndaǵylarǵa til tıgizip, qol jumsaǵan 22 jasar boıjetkenge ákimshilik hattama toltyryldy, dep habarlaıdy Kóliktegi ІІD baspasóz qyzmeti.
«8 mamyr kúni saǵat 00.55-te Almaty qalalyq áýejaıynyń Jelilik polıtsııa bólimine Air Astana áýe kompanııasynyń ókilinen 12-nshi turaqta «Almaty-Kýala-Lýmpýr» reısindegi ushaqqa otyrǵyzý kezinde mas kúıindegi jolaýshy anyqtalǵany jóninde habarlama kelip tústi. Ol dórekilik tanytyp, eskertýlerge qulaq aspaǵan, jolaýshylar men borttaǵy jolserikterdi balaǵattaǵan», delingen habarlamada.
Atalǵan jolaýshynyń 1994 jylǵy Qyrǵyzstan Respýblıkasynyń azamatshasy ekeni anyqtaldy. Atalǵan ákimshilik quqyq buzýshylyqqa sáıkes, polıtsııa qyzmetkerleri ony reısten túsirip tastady.
Kólik polıtseıleri ustalǵan azamatshanyń ústinen 2 bap, ıaǵnı, QR QK «Áýe kemesinde minez-qulyq qaǵıdalaryn buzý» jáne «Alkogoldik ishimdikterdi ishý nemese qoǵamdyq oryndarǵa mas kúıde kelý» boıynsha ákimshilik hattama toltyrdy.
Eske sala ketsek, «Quqyqtyq tártip» jedel-profılaktıkalyq is-sharasynyń barysynda ártúrli ákimshilik quqyq buzýshylyqtar úshin 789 quqyq buzýshy jaýapkershilikke tartyldy. Іzdeýde júrgen 1 qylmysker ustaldy.
