Ushaqpen vırýs taratty degen aqparat jalǵan – pýlmonolog
ALMATY. QazAqparat – Almaty Ftızıopýlmonologııa ortalyǵynyń juqpaly aýrýlar bóliminiń meńgerýshisi, ftızıohırýrg, pýlmonolog Abzal Malbasqanov el arasynda taraǵan «ushaqpen vırýs shashty» degen áńgimege qatysty túsinik berdi, dep habarlaıdy QazAqparat tilshisi.
Onyń aıtýynsha, el arasynda taraǵan «ushaqtarmen vırýs shashty» degen áńgime shyndyqqa janaspaıdy.
«Keıbir adamdar jalǵan aqparat taratýǵa qumar. Ushaqpen, tikushaqpen vırýs shashyp ketipti degen aqparat áleýmettik jelide kóptep taratylyp jatyr. Bul adamnyń aqylyna da syımaıdy. Bul suraqqa eýropalyq ǵalymdar birden jaýap bergen. Jer betindegi koronavırýs ınfektsııasynyń barlyǵyn jınaǵannyń ózinde jalpy salmaǵy 1 kelige jetpeıdi. Ony barlyq óńirge qalaı seýip shyǵýǵa bolady?», -dedi Malbasqanov.
Maman sondaı-aq, dezınfektsııalyq quraldar pnevmonııa týdyrady degen aqparatqa túsinik berdi.
«Dezınfektsııalyq quraldar pnevmonııa emes, allergııa týǵyzýy múmkin», - dedi ol.
Sonymen qatar, ol pnevmonııaǵa shaldyqqan adamdarǵa monshaǵa nege barýǵa bolmaıtyndyǵyn túsindirdi.
«Pnevmonııaǵa shaldyqqan naýqastarǵa 2-3 aı monshada býǵa túsýge bolmaıdy. Sebebi ystyqta atmosferalyq qysym kóterilip, júrek-qan tamyrlaryna, tynys alý júıesine keri yqpal etýi múmkin», - dedi ol.
