Ushaqpen saparlaıtyn qazaqstandyqtar sany 13 paıyzǵa artty
ASTANA. QazAqparat - 2018 jyldyń 8 aıynyń qorytyndysy boıynsha áýe kóligi jolaýshylarynyń sany 13 paıyzǵa ósken. Іshki naryqta jıiligi jaǵynan eń alda turǵan baǵdar - Almaty-Astana-Almaty bolyp otyr, dep habarlaıdy QazAqparat tilshisi Ranking.kz zertteýlerine silteme jasap.
2018 jyldyń qańtar-tamyz aılarynda áýe kóligi jolaýshylarynyń sany - 5,5 mln adam bolǵan. Bul ótken jyldyń sáıkes kezeńimen salystyrǵanda 12,7 paıyzǵa artyq.
Qazaqstandaǵy kólik kásiporyndarynyń kirisi 2018 jyldyń qańtar-tamyz aılarynda 1,8 trln teńgege jetken. Onyń ishinde áýe kóligi kásiporyndarynyń tabysyna - atalmysh kórsetkishtiń 12,2 paıyzy, ıaǵnı 224,8 mlrd teńgesi (bir jyldyń ishindegi ósim - 18,1 paıyz) tıesili.
Áýe kóligimen júk tasymaldaý jáne bagaj qyzmetinen túsken tabys asa kóp emes - barlyq somanyń 0,001 paıyzy ǵana osy qyzmetke tıesili.
Al Azamattyq avıatsııa komıtetinen habarlanyp otyrǵandaı, ishki naryqtaǵy halyq eń kóp ushatyn áýe baǵyty - «Almaty - Astana - Almaty». Bul marshrýt boıynsha eki baǵytqa 4 áýe kompanııasy («Eır Astana», «SCAT», «Bek Eır», «Qazaq Air») aptasyna 274 reıs oryndaıdy. Orta eseppen Astanadan Almatyǵa jáne keri ushýǵa bolatyn kúndelikti 19 reıs bar.
Ekinshi halyq kóp ushatyn baǵyt - «Almaty - Shymkent - Almaty». Bul marshrýt boıynsha eki baǵytqa 4 áýe kompanııasy («Eır Astana», «SCAT», «Bek Eır», «Qazaq Air») aptasyna 62 reıs oryndaıdy.
Úshinshi orynda - Astana - Shymkent - Astana marshrýty. Bul baǵytta 3 áýe kompanııasy («Eır Astana», «SCAT», «Bek Eır») aptasyna 60 reıs oryndaıdy.
Qazaqstan Respýblıkasynda halyqaralyq naryqta jolaýshy tasymaldaıtyn 25 sheteldik jáne 2 qazaqstandyq áýe kompanııasy bar. Halyqaralyq baǵytta eń kóp qoldanylatyn - «Almaty - Máskeý - Almaty» marshrýty. Bul baǵytqa eki áýe kompanııasy («Eır Astana», «Aeroflot») aptasyna 60 reıs oryndaıdy.
Halyq tarapynan suranysqa ıe ekinshi baǵyt - «Astana - Máskeý - Astana». Bul baǵytqa eki áýe kompanııasy («Eır Astana», «Aeroflot») aptasyna 48 reıs oryndaıdy.
Úshinshi orynda - «Almaty - Ystambul - Almaty» marshrýty. Bul eki baǵytqa eki áýe kompanııasy («Eır Astana», «Turkish Airlines») aptasyna 34 reıs oryndaıdy.
