Ushaqqa dombyramen minerde neni eskerý kerek

ASTANA. KAZINFORM – Kólik mınıstri Marat Qarabaev ushaqqa mýzykalyq aspappen eskertýsiz kelip, keıinnen daý shyǵaratyn tanymal tulǵalarǵa renishin bildirdi. Sondaı-aq, mýzykalyq aspappen jol júrý qaǵıdasyn túsindirdi.

Úkimette ótken brıfıngte tilshiler ulttyq aspaptyń ushaq bortyna syımaıtynyn, júk bóliginde joǵalyp ketetinin aıtyp, bul máseleni sheshý joldaryn surady. 

Óz kezeginde Kólik mınıstri qandaı aspap bolatynyn, onyń ólshemderin aldyn-ala eskerý qajettigin aıtýda. 

«Mýzykalyq aspapty qolda ustap otyrýǵa bolmaıdy, bul qaýipsizdik erejesine saı kelmeıdi. Ústińgi júksalǵyshqa da keıde syımaı qalýy múmkin. Óıtkeni, elimizdegi ushaqtyń gabarıti alýan túrli – Bombardır-190, Boıng-737, Eırbas-320 bolýy múmkin. Sondyqtan jolaýshy bılet alarda nemese kompanııaǵa habarlasyp, mýzykalyq aspappen ushatynyn eskertip, málimetti naqtylaýy kerek. Ózimen birge ala kiretin múmkindigi bolmasa, kompanııa qosymsha oryn satyp alýǵa keńes berer edi. Máseleniń bári osynda», - dep jaýap berdi M. Qarabaev. 

Mınıstr keı juldyzdardyń máseleniń baıybyna barmaı, ushar aldynda daý shyǵaryp, vıdeoǵa túsiretinine qynjyldy. 

«Janýarmen birge saparlaıtyndar da jaǵdaıyn aldyn ala eskertedi. Sol sekildi mýzykalyq aspapty da aldyn ala aıtsa, ushaq kólemin naqtylap alsa, esh másele týyndamas edi», - dedi spıker.