Ushaq shyǵara almaǵan zaýyt qurǵaq bıe sútin óndiretin kásiporynǵa aınalady
QARAǴANDY. QazAqparat - Jaqyn arada kópshilikke tanymal, konveıerinen birde bir ushaq shyǵarylmaǵan avıazaýyttyń ǵımaratynda qurǵaq bıe sútin óndiretin kásiporynnyń tsehy ornalasatyn bolady. Bul jobany júzege asyrýǵa kómektesýge QR Aýyl sharýashylyǵy mınıstri Ómirzaq Shókeev ýáde berdi, dep habarlaıdy Qaraǵandy oblysy ákiminiń resmı saıty.
Qazir «Eýrazııa Invest LTD» qurǵaq bıe sútin óndiretin zaýyt Jansary kentiniń mańynda ornalasqan. Onda 700 bıe saýylyp, súti óńdeledi. Daıyn untaq farmatsevtıka men balalar taǵamyn shyǵarýda qoldanylady. Ónim Reseı men Qytaıǵa eksporttalady.
Sútti untaqqa aınaldyrý tehnologııasy Qazaqstan úshin biregeı. Osy sekildi óndiris, biraq anaǵurlym kishirek kólemde Germanııada ǵana bar.
Ómirzaq Shókeev ınnovatsııalyq tehnologııamen Qaraǵandyǵa jumys sapary barysynda tanysyp shyqty. Aýyl sharýashylyǵy mınıstrine saýý apparattary, jylqylarǵa arnalǵan qashalar men zerthanalar kórsetildi.
- Bizdiń qazirgi zaýyt shalǵaıda ornalasqandyqtan belgili bir qıyndyqtarǵa tap bolyp otyrmyz: elektr qýaty keıde óship qalady, qysqy ýaqytta ónimdi jetkizý qıynǵa soǵady, bilikti mamandardy jumyldyrý kúrdeli. Biz ol máselelerdi sheshý joldaryn qurdyq. Qaraǵandynyń mańynda ornalasqan burynǵy «KazAvıaSpektr» zaýytynyń ǵımaratyn satyp aldyq. Onda sútti untaqqa aınaldyrýǵa arnalǵan qurylǵylardy ornatýdy josparlap otyrmyz, al munda mal basyn 1500-ǵa deıin ulǵaıtyp, bıelerdi asyrap, saýatyn bolamyz. Biz turǵyndardan maýsymda 2 mln lıtr sút satyp alamyz, bul daıyn ónim kólemin 200 tonnaǵa deıin ulǵaıtýǵa múmkindik beredi. Alaıda ol úshin bizge 3 mlrd 80 mln teńge kóleminde qarajat qajet, - dedi mınıstrge jylqy zaýytynyń basqarýshysy Baıan Elshın.
Oǵan Ómirzaq Shókeev bul máseleni sheshýde kómek kórsetetinin aıtyp, ýáde berdi.
«Eýrazııa Invest LTD» zaýyty 2015-shi jyly iske qosyldy. Oǵan shamamen 2,5 mlrd teńge qarajat salynǵan, onyń ishinde 1,7 mlrd teńge - «QazAgroFınans» AQ men Agrarlyq Nesıe Korporatsııasynyń qarajaty. Búgingi tańda zaýytta 700 bıe bar, 145 bilikti maman qyzmet etedi. Bir jylda kompanııa shamamen 30 tonna daıyn ónim óndiredi. 2017-shi jyly zaýyt Reseı, Belarýs, Qytaı jáne AQSh-qa 4,6 tonna untaq qospa satqan.
Esterińizge sala keteıik, «KazAvıaSpektr» zaýyty 2012-shi jyly salynǵan. Onda «Fermer-2» jáne «Fermer - 500» modeldi úshaqtar jasalyp, eksporttalýy tıis bolatyn. Alaıda, jumys istegen ýaqytynda zaýyttan birde bir áýe kemesi jasap shyǵarylmady. 2017-shi jyly ol bankrot dep jarııalandy.
