Ushaq salony tútinge kómilip, shuǵyl qonýǵa májbúr boldy
NUR-SULTAN. QazAqparat – British Airways brıtandyq kompanııasy áýe kemesiniń salonynan qatty tútin shyǵyp, shuǵyl túrde Ispanııanyń Valensııa qalasyna qonýǵa májbúr boldy, dep habarlaıdy QazAqparat euronews.com saıtyna silteme jasap.
Londonnyń Hıtroý áýejaıynan shyqqan A321 laıneri shuǵyl qonǵannan keıin 200 jolaýshy úrmeli apattyq basqyshtyń kómegimen evakýatsııalandy.
Kýágerlerdiń aıtýynsha, ushaqtyń salonyn shamamen 10 mınýttaı tútinniń ıisi alyp turǵan, alaıda jolaýshylarǵa ottegimen demalý maskasy usynylmaǵan.
Mirror brıtandyq basylymynyń aldyn ala aqparatyna sáıkes, oqıǵa saldarynan kem degende 20 adam zardap shekken, kem degende úsh adam aýrýhanaǵa jetkizildi. Jeńil jaraqattanǵan jolaýshylarǵa áýejaıda qajetti kómek kórsetildi.
Tútinniń shyǵý sebepteri ázirge belgisiz.
