Ushaq reısi keshikken jaǵdaıda jolaýshy qandaı quqyqqa ıe

ASTANA. QazAqparat – Jańa jyl merekesine oraı ushaqpen jaqyndaryna baratyn nemese saıahatqa shyǵatyn turǵyndar az emes. Osy oraıda, QazAqparat agenttigi Indýstrııa jáne ınfroqurylymdyq damý mınıstrligine silteme jasaı otyryp, ushaq reısi keshikken jaǵdaıda saqtalýy tıis jolaýshy quqyqtaryn eske salady.

Reıs toqtatylǵan nemese keshiktirilgen kezde tasymaldaýshy jolaýshylar úshin jóneltý pýnktterinde jáne aralyq pýnktterde kelesi qyzmetterdi uıymdastyrýǵa mindetti:

1) 7 jasqa deıingi balasy bar jolaýshyǵa ana men bala bólmesin (bolǵan jaǵdaıda) usynady;

2) reıs 2 saǵattan artyq keshikken kezde telefonmen uzaqtyǵy 5 mınýttan aspaıtyn eki qońyraý shalýǵa (onyń ishinde halyqaralyq baılanys jelileri boıynsha) nemese elektrondyq poshta arqyly eki habarlama jiberýge múmkindik usynady;

3) reısti eki saǵattan artyq kútken kezde jolaýshylardy salqyn sýsyndarmen qamtamasyz etedi;

4) reıstiń jóneltilýin 4 saǵattan artyq jáne odan ári kútý kezinde ystyq tamaqpen qamtamasyz etedi:

- kúndizgi ýaqytta ár 6 saǵat saıyn;

- túnde ár 8 saǵat saıyn;

5) reıs kúndiz 8 saǵattan artyq jáne túngi ýaqytta 6 saǵattan artyq keshikken jaǵdaıda avıakompanııa jolaýshyny ózi usynatyn qonaqúıge ornalastyrady;

6) avıakompanııa usynatyn kólik jolaýshyny áýejaıdan qonaqúıge deıin jáne qonaq úıden keri jetkizýdi qamtamasyz etedi;

7) tasymaldaýshynyń kinásinen reıs 10 saǵattan artyq merzimge toqtatylǵan nemese keshikken bolsa, tasymaldaýshy jolaýshyny bılette kórsetilgen mejeli pýnktke deıin eń jaqyn reıspen tasymaldaýdy qamtamasyz etedi;

8) jolaýshyǵa bılettiń tolyq qunyn qaıtarady.

Budan basqa, avıakompanııa naqty qandaı da bir jaǵdaıǵa baılanysty reısterdi keshiktirgenin dáleldemese, onda árbir keshikken saǵaty úshin jolaýshyǵa bılet qunynyń 3 paıyzy mólsherinde aıyppul tóleıdi. Ótemaqy alý úshin jolaýshylar tikeleı avıakompanııaǵa habarlasýy kerek. Eskeretini – bul qyzmetter reıstiń keshigýi avıakompanııanyń kinásinen bolǵan jaǵdaıda ǵana usynylady.