Ushaq, poıyz jáne teńiz kóliginiń jolaýshylary týraly aqparat arnaıy organdarǵa jiberiledi
ASTANA. KAZINFORM — 2025 jyldyń 31 tamyzynan bastap tasymaldaýshylar ushaqtarǵa, poıyzdarǵa jáne teńiz kóligine satyp alynǵan jáne brondalǵan bıletter týraly málimetterdi quqyq qorǵaý jáne arnaıy memlekettik organdarǵa berýdi bastaıdy. Tıisti buıryqtyń jańa redaktsııasyna kólik mınıstriniń mindetin atqarýshy qol qoıdy, dep habarlaıdy Kazinform.
Qujatqa sáıkes, tasymaldaýshylar mynadaı aqparatty usynýǵa mindetti: tegi, aty, ákesiniń aty (bolǵan jaǵdaıda), týǵan kúni, jynysy, azamattyǵy, jeke basyn kýálandyratyn qujat derekteri, sapar baǵyty, júgi týraly málimet, tólem aqparaty, oryn nómiri, sondaı-aq jolaýshy kelisim bergen jaǵdaıda baılanys derekteri.
Bıletterdi satýdy júzege asyratyn tasymaldaýshy nemese ózge tulǵa jolaýshylardyń derbes derekterin berýge (jınaýǵa) jáne óńdeýge kelisim alýyn qamtamasyz etedi.
Resmı qujatta kórsetilgendeı, resmı organdarǵa beriletin rásimdelgen jáne (nemese) brondalǵan bıletterge qatysty barlyq málimet quqyq qorǵaý, arnaıy memlekettik jáne ózge de organdardyń aqparattyq almasý júıesi arqyly jáne/nemese quqyq qorǵaý jáne arnaıy memlekettik organdardyń aqparattyq júıelerimen tikeleı yqpaldasý jolymen beriledi.
Aqparattardy qabyldaý-berý protsesindegi barlyq ýaqyttyq parametrler Astana ýaqytymen tirkeledi.
Aqparat almasý barysynda týyndaǵan problemalyq jaǵdaılarda qatysýshylar olardy joıýǵa shara qoldanýy tıis.
Áýe tasymaly
Málimetter eki ret beriledi: ushýǵa 48 saǵat qalǵanda jáne reıske tirkeý aıaqtalǵan soń 30 mınýt ishinde. Bul derekter Qazaqstanǵa ushyp keletin jáne elden ushyp shyǵatyn barlyq áýe kompanııasymen, onyń ishinde sheteldik áýe tasymaldaýshylarymen de beriledi. Málimetter paketine jolaýshynyń jeke derekteri, bılet aqparaty, oryn nómiri, sapar baǵyty, bagaj jáne tólem tásili kiredi.
Temirjol tasymaly
Jolaýshylar týraly málimetter ASÝ «Ekspress» júıesi arqyly beriledi. Oǵan jolaýshy qujatynyń derekteri, baǵyty, orny jáne satyp alynǵan nemese brondalǵan bıletke qatysty aqparat kiredi. Barlyq rásimdelgen jáne (nemese) brondalǵan bılet týraly derekter táýligine bes ret usynylady.
Derekterdi berý ýaqyty:
saǵat 5:00-den 6:00-ge deıin (22:01-den 5:00-ge deıingi kezeń boıynsha birinshi túsirý);
saǵat 8:00-den 9:00-ge deıin (5:01-den 8:00-ge deıingi kezeń boıynsha ekinshi túsirý);
saǵat 10:00-den 11:00-ge deıin (8:01-den 10:00-ge deıingi kezeń boıynsha úshinshi túsirý);
saǵat 16:00-den 17:00-ge deıin (10:01-den 16:00-ge deıingi kezeń boıynsha tórtinshi túsirý);
saǵat 22:00-den 23:00-ge deıin (16:01-den 22:00-ge deıingi kezeń boıynsha besinshi túsirý).
Teńiz tasymaly
Teńiz kóliginde rásimdelgen nemese brondalǵan bıletter týraly málimetter ýákiletti memlekettik organǵa nemese quqyq qorǵaý jáne arnaıy memlekettik organdarǵa tasymaldaýshylar tarapynan, onyń ishinde Qazaqstan aýmaǵyna keletin, elden shyǵatyn nemese tranzıtpen ótetin sheteldik tasymaldaýshylar tarapynan da usynylady.
Bıletterdi teńiz vokzaldaryndaǵy kassalardan nemese jolaýshynyń suraýy boıynsha jetkizý arqyly satqan jaǵdaıda derekterdi tirkeý qamtamasyz etiledi.
Teńiz kóliginde rásimdelgen nemese brondalǵan bıletter týraly málimetter tasymaldaýshylar tarapynan ýákiletti memlekettik organǵa nemese quqyq qorǵaý jáne arnaıy memlekettik organdarǵa kestege sáıkes táýligine tórt retke deıin beriledi.
Bul buıryq 2025 jylǵy 31 tamyzdan bastap kúshine enedi.
Buǵan deıin biz Astana halyqaralyq áýejaıynyń ushý-qoný jolaǵy ýaqytsha jabylatynyn habarlaǵan edik. Jolaýshylar neni bilýi tıis ekeni jaıly myna siltemeden oqýǵa bolady.
Aıta ketelik EAEO elderi aýyr júk kólikteriniń jol júrýin jeńildetedi.