Ushaq qozǵaltqyshy isten shyqty degen aqparat jalǵan - FlyArystan
NUR-SULTAN. QazAqparat – FlyArystan áýe kompanııasy ushaq qozǵaltqyshynyń isten shyǵýy týraly aqparatty teriske shyǵardy, dep habarlaıdy QazAqparat tilshisi.
«Moı gorod» portalynda jarııalanǵan FlyArystan ushaǵy qozǵaltqyshynyń isten shyǵýy týraly aqparattyń jalǵan ekenin habarlaımyz. 2019 jyldyń 30 shildesinde FlyArystan áýekompanııasynyń Oral-Almaty baǵytyna ushýdy josparlaǵan KS7168 reısi keshiktirilip ushyryldy. Sebebi – aýa jiberýdi baqylaý júıesin qosymsha tekserý qajet boldy. FlyArystan-nyń basty ustanymdarynyń biri – qaýipsizdik. Sondyqtan, áýe kompanııasynyń ınjenerleri bortty tolyq tekserýden ótkizýdi jón kórdi. Qajetti tehnıkalyq tekseristen keıin áýe kemesi jumysyn oıdaǵydaı jalǵastyrdy», - dep habarlady FlyArystan áýe kompanııasynyń baspasóz qyzmeti.
Reıstiń keshigetini týraly aqparattan keıin áýe kompanııasynyń Oral qalasyndaǵy qyzmetkerleri jolaýshylarǵa sý men jeńil taǵam taratqan jáne ótinim bildirgen 50 adamdy qonaq úıde ornalastyrǵan.
