Ushaq qatty shaıqaldy: Shymkentke bet alǵan reıs Tarazǵa qonýǵa májbúr boldy
ShYMKENT. KAZINFORM — Almaty — Shymkent baǵytyndaǵy SCAT áýe kompanııasynyń reısi qolaısyz aýa raıyna baılanysty Shymkent áýejaıyna qona almaı, Tarazdaǵy qosalqy áýejaıǵa baǵyttaldy.
Threads áleýmettik jelisinde ushaq salonynan túsirilgen beınejazbalar jarııalandy. Onda ushaqtyń qatty shaıqalǵany jáne syrtta naızaǵaı jarqyldary kórinedi.
Jolaýshylardyń aıtýynsha, reıs Almatydan bir saǵatqa keshigip ushqan. Al Shymkentke qonýǵa shamamen 15 mınýt qalǵanda aýa raıy kúrt nasharlap, qatty týrbýlenttilik bastalǵan.
— Naızaǵaı oınap, ushaq qatty shaıqaldy. Jerge jaqyn bolǵandyqtan kóptegen jolaýshy qorqyp, keıbiri jylap, duǵa oqydy. Bortserikter jaǵdaıdyń baqylaýda ekenin aıtyp, sabyr saqtaýǵa shaqyrdy. Keıin ekıpaj Tarazdaǵy qosalqy áýejaıǵa qoný týraly sheshim qabyldady. Biz ol jerge túngi saǵat eki shamasynda jettik. Keıin Shymkentke qaıta ushý uıymdastyryldy, biraq bastan keshken jaǵdaıdan keıin jolaýshylardyń jartysyna jýyǵy ushýdy jalǵastyrýdan bas tartty, — dedi jolaýshylardyń biri.
SCAT áýe kompanııasy Kazinform agenttiginiń resmı saýalyna bergen jaýabynda ushaqtyń qosalqy áýejaıǵa baǵyttalýyna aýa raıynyń kúrt nasharlaýy sebep bolǵanyn málimdedi.
— Shymkent áýejaıyna qoný kezinde jeldiń ekpini sekýndyna 24 metrge deıin kúsheıip, naızaǵaı men nóser jańbyr baıqaldy. Sondaı-aq jel yǵysýy qaýpi boldy. Osyǵan baılanysty ekıpaj Tarazǵa ushý týraly sheshim qabyldady. Aýa raıy jaqsarǵannan keıin áýe kemesi reısti jalǵastyrdy. Ushaq qosalqy áýejaıda shamamen 1,5 saǵat aıaldap, keıin Shymkentke qalypty rejımde qondy. Jolaýshylar men ekıpajdyń qaýipsizdigi — bizdiń basty basymdyǵymyz, — dedi SCAT áýe kompanııasynyń ókili Vıktorııa Starojılova.
«Qazgıdromet» málimetinshe, Shymkentte jeldiń ekpini sekýndyna 17 metrge deıin jetken. Bul kórsetkish qaýipti meteorologııalyq qubylys sanatyna jatady.
Shymkent qalalyq Tótenshe jaǵdaılar departamenti qolaısyz aýa raıyna qaramastan, shuǵyl qyzmetterge túsken shaqyrtýlar sany aıtarlyqtaı artpaǵanyn habarlady. Qutqarýshylar shtattyq rejımde jumysyn jalǵastyrǵan.
— Jedel áreket etý barysynda Turan aýdanyndaǵy Qazyǵurt shaǵynaýdanynda, Arystanbab pen Otyrar kósheleriniń qıylysynda qutqarýshylar jel ushyryp ákelgen kólemi 8×4 metr bolatyn profnastıl qańyltyrdy elektr baǵanynan alyp tastady. «112» qyzmetine basqa tótenshe jaǵdaılar týraly habarlamalar túsken joq, — dep málimdedi Shymkent qalalyq TJD.
Eske salaıyq, buǵan deıin sınoptıkter Qazaqstan aýmaǵynda naızaǵaı, burshaq jáne ekpindi jelmen qatar júretin qolaısyz aýa raıy bolatynyn eskertken bolatyn.
