Ushaq dvıgateline jasyrynyp Mysyrǵa ushpaq bolǵan
ASTANA. QazAqparat - Reseıdiń Kemerov qalasynyń kólik prokýratýrasy 35 jastaǵy er adamnyń Alekseı Leonov atyndaǵy áýejaıǵa zańsyz enýi faktisine qatysty tekserý júrgizýde.
Ol aımaq astanasynan Mysyrdyń Hýrgadý kýrorttyq qalasyna reısti júzege asyratyn Boeing ushaǵynyń dvıgateline jasyrynyp qalǵan, dep habarlaıdy ITAR-TASS. «Qupııa jolaýshy» ushaq áýege kóterilmes buryn ony tekserý kezinde tabylǵan. «Ony suraqtardyń astyna alǵanymyz esh nátıje bermedi. Sebebi, er adam eshnárse túsindire alatyn kúıde emes edi. Biz ony jedel járdem qyzmetkerlerine tapsyrdyq. Qazir qolymyzda medıtsınalyq saraptama nátıjeleri bolmaǵandyqtan, bul azamattyń ishimdik iship nemese esirtki shegip alǵan kúıde bolǵan-bolmaǵandyǵyn aıta almaımyz», - dedi prokýratýra qyzmetkerleri. Oqıǵadan soń ushaq Hýrgadýǵa ushyp ketken, oǵan esh zaqym kelmegen. Sondaı-aq áýejaıda avıatsııalyq qaýipsizdik talaptarynyń saqtalýy da tekserilýde, odan keıin aerovokzaldyń laýazymdy tulǵalaryn jaýapkershilikke tartý týraly sheshim qabyldanbaq.
