Ushaq bortynda janǵan smartfonnyń kesirinen áýe kemesi qulaýǵa shaq qaldy
ASTANA. QazAqparat - Aýstralııaǵa ushyp bara jatqan Qantas avıakompanııasynyń ushaǵynda synǵan smartfon janyp, bortynda órt shyqty, dep habarlaıdy QazAqparat Daily Mall gazetine silteme jasap.
Bıznes-klass jolaýshylary ushaq qonǵanǵa deıin eki saǵat buryn janǵan rezeńkeniń ıisin sezgen. Tasymaldaýshy ókili málim etkendeı, jolaýshylardyń biri telefonyn túsirip alyp, qurylǵy oryndyqtardyń ortasyna qystyrylyp qalady. Iesi kreslony ornynan jyljytqan kezde smarfon lap etip janǵan. Abyroı bolǵanda ol jyldam sóndirilip, dúrlikken jolaýshylardyń kóńili ornyna tústi.
«Qurylǵy sóndirilgen boıda ushqysh jedel ortalyqqa habarlasyp, Melbýrnǵa ushýyn jalǵastyra berdi», - dedi basylymǵa suhbat berýshi.
Jolaýshylardyń aıtýynsha, eki jolserik órt sóndirgishtiń kómegimen jalyndy aýyzdyqtaǵan.
