Ushaq bortynda temeki tartqandarǵa jaza kúsheıtilmek
ASTANA. QazAqparat - Qazaqstanda ushaq bortynda temeki tartqan adamdarǵa jazany kúsheıtý máselesi qarastyrylyp jatyr. Bul týraly Májilistiń jalpy otyrysynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Halyqaralyq tájirıbede osyndaı zań buzýshylyqtardyń aldyn alýǵa qatysty qadamdar ártúrli. Osydan 2-3 jyl buryn zańnamaǵa túzetýlerdi qabyldaǵan kezde, atalǵan buzýshylyqtarǵa jazalaý sharalaryn qoldaný kúsheıtilgen edi. Sol kezde 15 táýlikke qamaýǵa alý, 200 AEK somasynda aıyppul eskerilgen bolatyn. Bul óz kezeginde, basqa da avıatsııalyq bılikter qabyldap jatqan osy tektes sharalarǵa sáıkes keletin jaza. Búginde áýe kompanııalarymen birlese jaýapkershilikti kúsheıtý máselesin pysyqtap, jazany qatańdatý qadamdaryn jalǵastyrmaqpyz», - dedi Jeńis Qasymbek.
Budan buryn habarlanǵandaı, búgingi jalpy otyrys barysynda «Halyqaralyq azamattyq avıatsııaǵa qatysty zańsyz aktilerge qarsy kúres jónindegi konventsııany ratıfıkatsııalaý týraly» zań jobasy maquldandy.
Zań jobasy «Halyqaralyq azamattyq avıatsııa uıymy (IKAO) Assambleıasynyń 38-shi sessııasynyń sheshimin júzege asyrýǵa baǵyttalǵan. Ol barlyq IKAO-ǵa múshe memleketterdi osy Konventsııaǵa qol qoıýǵa jáne ratıfıkatsııalaýǵa shaqyrady. Bul jobanyń maqsaty - azamattyq avıatsııa salasynda zańsyz áreketter jasaǵan tulǵalarǵa qylmystyq jaýapkershilik taǵaıyndaý.
