Ushaq bortynda tártip buzatyndarmen kúresetin qujat maquldandy
ASTANA. QazAqparat - Parlament Májilisiniń jalpy otyrysynda «Áýe kemeleriniń bortynda jasalatyn qylmystar jáne keıbir basqa da aktiler týraly konventsııany jáne Áýe kemeleriniń bortynda jasalatyn qylmystar jáne keıbir basqa da aktiler týraly konventsııany ózgertetin Hattamany ratıfıkatsııalaý týraly» zań jobasy maquldandy, dep habarlaıdy QazAqparat.
«Ratıfıkatsııalaýdyń maqsaty - Halyqaralyq azamattyq avıatsııa uıymy assambleıasynyń 39 sessııasy sheshimin júzege asyrý. Bul halyqaralyq sharttar áýe kemeleriniń bortynda tártipsiz minez-qulyqtyń jolyn kesý jáne tártipke baqylaý jasaýǵa baǵyttalǵan. Konventsııa men Hattamada, sondaı-aq áýe kemesiniń komandırleri men ekıpaj músheleriniń ushý kezinde tártipsiz jolaýshylarǵa qoldanatyn shekteýli sharalar boıynsha ókilettikteri anyqtaldy jáne keńeıtildi. Hattamada ekıpaj músherelirine, jolaýshylarǵa jáne qaýipsizdik qyzmetiniń qyzmetkerlerine tártipsiz jolaýshylarǵa qatysty aldyn alý sharalaryn qoldanýǵa múmkindik beretin normalar kózdelgen», - dedi QR Investıtsııalar jáne damý birinshi vıtse-mınıstri Roman Sklıar.
Osy oraıda, ol Qazaqstan Respýblıkasynyń qoldanystaǵy zańnamalarynda osy áreketter úshin jaýapkershilik qarastyrylǵanyn eske salyp ótti.
«Bul halyqaralyq sharttardy júzege asyrý - áýe kemesiniń bortynda mazasyz jáne tártipsiz jolaýshylarmen problemalardy sheshýge járdemdesedi. Konventsııa men Hattamany ratıfıkatsııalaý Qazaqstan tarapynan qosymsha shyǵyndar men mindettemelerdi qajet etpeıdi», - dedi Roman Sklıar.
Sonymen qatar, jalpy otyrysta «Áýe kemelerin zańsyz basyp alýǵa qarsy kúres týraly konventsııany jáne Áýe kemelerin zańsyz basyp alýǵa qarsy kúres týraly konventsııany tolyqtyratyn Hattamany ratıfıkatsııalaý týraly» zań jobasy da maquldandy.
