Ushaq bortyndaǵy oqıǵadan keıin Flydubai Izraıl reısterin ýaqytsha toqtatty
ASTANA. KAZINFORM – BAÁ men Izraıl arasyndaǵy áýe qatynasynyń ózgerýi Dýbaıdan elge qaıtýdy josparlaǵan jolaýshylardyń saparyna da áser etti, dep habarlaıdy Kazinform agenttiginiń tilshisi.
Flydubai Dýbaı–Tel-Avıv baǵytyndaǵy FZ1073 reısinde bolǵan oqıǵanyń mán-jaıy anyqtalǵansha Izraılge jáne Izraılden qatynaıtyn barlyq reısti ýaqytsha toqtatý týraly sheshim qabyldady. Bul aqparatty kompanııa ókili rastady.
Reısterdiń ýaqytsha toqtatylýy tıisti organdarǵa tergeýdi jalǵastyryp, oqıǵanyń mán-jaıyn tolyq anyqtaýǵa múmkindik beredi, — delingen kompanııa málimdemesinde.
Áýe tasymaldaýshy kompanııa quzyrly organdarmen, avıatsııa salasynyń retteýshi qurylymdarymen jáne áýejaılarmen birlesip jumys istep jatqanyn aıtty. Reısterdi qaıta bastaý týraly sheshim jańa málimetter túsken saıyn qaıta qaralyp otyrady. Ázirge reısterdiń naqty qashan iske qosylatyny belgisiz.
Oqys jaǵdaı 30 qyrkúıek kúni tańerteń tirkelgen. Ushaq kabınasynda bolǵan oqıǵadan keıin ekıpaj tótenshe jaǵdaı týraly belgi berip, Saýd Arabııasyndaǵy Tabýk áýejaıyna shuǵyl qonǵan. Borttaǵy jolaýshylardyń barlyǵy aman-esen túsirilip, sol kúni keshke Flydubai-dyń basqa reısimen Izraılge jetkizilgen.
Izraıl bıligi men jolaýshylardyń habarlaýynsha, ekinshi ushqysh áýe kemesiniń komandırine pyshaq suqqan. Osydan keıin ushaq kúrt tómendeı bastaǵan. Sol kezde jolaýshylar shabýyl jasaǵan ushqyshty ustap, ony zalalsyzdandyrǵan.
Áýe kompanııasynyń habarlaýynsha, ushaqty bortta jolaýshy retinde otyrǵan, kezekshilikte bolmaǵan Flydubai ushqyshtary qaýipsiz jerge qondyrǵan.
Oqıǵanyń mán-jaıy ázirge tergerilip jatyr. Áýe kompanııasy tergeý aıaqtalǵansha, asyǵys sheshim jasamaýǵa shaqyrdy.
Reısterdiń toqtatylýyna baılanysty Dýbaıda qalyp qoıǵan azamattaryn elge qaıtarý úshin Izraıl evakýatsııalyq reıster uıymdastyrýǵa daıyndalyp jatyr.
Ynet basylymynyń habarlaýynsha, qaýipsizdik sharalaryn pysyqtaý úshin Izraıldiń ishki qaýipsizdik qyzmeti «Shabak» ókilderi BAÁ-ge attanǵan. Evakýatsııalyq reısterdi 2 qazannan bastap iske qosý kózdelip otyr.
Sońǵy birneshe aıda qaýipsizdikke qatysty Izraıldiń áýe kompanııalary BAÁ-men áýe qatynasyn toqtatqan edi. Al Izraıldiń «El-Al» áýe kompanııasy qarasha aıynda Dýbaıǵa turaqty reısterdi qaıta bastaýdy josparlap otyrǵanyn málimdedi. Alaıda bul úshin Izraıl bıliginiń tıisti ruqsaty qajet.
Sonymen qatar jolaýshylar áýe kemesiniń bortynda ne bolǵanyn jáne yqtımal apattyń qalaı aldyn alǵanyn baıandaǵanyn jazǵan edik.
